PORMAL nang inilunsad ng Department of Agriculture (DA), sa pamamagitan ng Export Development Office (EDO), ang Agri-Export Help Desk upang palakasin ang suporta sa mga agricultural exporter sa bansa.

Inilunsad ang inisyatiba noong Enero 16, 2026 bilang isang one-stop platform na layong pabilisin ang mga serbisyo, palakasin ang koordinasyon ng mga ahensya ng gobyerno, at magbigay ng agarang tulong sa mga stakeholder sa sektor ng agri-export.

Ayon sa DA, hindi lamang ito simpleng reporma sa proseso kundi magsisilbing tulay sa pagitan ng pribadong sektor at regulatory agencies ng kagawaran. Layunin nitong pag-isahin ang komunikasyon at serbisyong ibinibigay ng iba’t ibang ahensya upang mapalakas ang export industry ng agrikultura.

Pinangunahan ang paglulunsad nina Undersecretary for Policy, Planning, and Regulations Asis G. Perez at Assistant Secretary at Special Assistant for Export Development Philip C. Young, kasama ang mga kinatawan mula sa iba’t ibang ahensya na katuwang sa programa.

Kabilang sa mga nakipagtulungan sa Agri-Export Help Desk ang Agribusiness and Marketing Assistance Service (AMAS), Agricultural Credit Policy Council (ACPC), Bureau of Animal Industry (BAI), Bureau of Fisheries and Aquatic Resources (BFAR) sa ilalim ng Fisheries Clustering and Consolidation Program (F2C2), Food Development Center (FDC), National Meat Inspection Service (NMIS), National Tobacco Administration (NTA), Philippine Coconut Authority (PCA), at Philippine Fiber Industry Development Authority (PhilFIDA).

Ginawang pormal ang pagtatatag ng Help Desk sa ilalim ng DA Memorandum Order No. 09, Series of 2025. Sinusuportahan naman ang operasyon nito sa pamamagitan ng DA Special Order No. 363, Series of 2025, na inamyendahan ng Special Orders No. 1862 at 1961 para sa pagtatalaga ng permanent at alternate focal persons mula sa bawat ahensya.

Sa mga may katanungan o concern kaugnay ng agri-export, maaaring makipag-ugnayan sa agriexport.helpdesk@da.gov.ph.

(PAOLO SANTOS)