KINUMPIRMA ng Malakanyang ang pagkakatalaga ni Pangulong Ferdinand Marcos Jr. kay Arnell Ignacio bilang administrator ng Overseas Workers Welfare Administration (OWWA).
Isang text message na “yes, OWWA administrator” ang naging tugon ni Press Secretary Trixie Cruz-Angeles sa tanong kung itinalaga ni Pangulong Marcos si Ignacio sa nasabing posisyon.
Naging Assistant Vice President for Community Relation and Services Department si Ignacio ng Philippine Amusement and Gaming Corporation (PAGCOR).
Makaraan nito ay lumipat siya sa OWWA para magsilbi bilang deputy executive director.
Samantala, itinalaga rin ni Pangulong Marcos Jr. si Undersecretary on Welfare and Foreign Employment Atty. Hans Leo Cacdac sa Department of Migrant Workers.
Mapupunta rin sa Migrant Workers si POEA Administrator Bernard Olalia na magsisilbing Undersecretary for Licensing and Adjudication.
Habang mananatiling OIC ng POEA si Olalia hangga’t maisaayos na ang budget ng Kagawaran ng Migrant Workers sa 2023.
Isa namang OFW na nagtrabaho sa abroad ng 29 taon kabilang na sa Jeddah, Saudi Arabia ang itinalaga rin sa DMW.
Si Venecio Legaspi ay magsisilbing Assistant Secretary for Reintegration ng Department of Migrant Workers. (CHRISTIAN DALE)
213 
