BATANGAS – Nalunod ang isang 12-anyos na batang lalaking estudyante nang maligo sa isang ilog sa bayan ng Ibaan sa lalawigan noong Lunes.

Kinilala ang biktimang si Rigor Perez Mangubat, residente ng Brgy. Quilo, Ibaan,

Ayon sa report ng Ibaan Police, nagtungo sa ilog sa Sitio Sagingan, Brgy. Coliat, ang biktima kasama ang ilang kaibigan para maligo.

Makaraan ang isang oras, hindi namalayan ng mga kasama na lumubog na pala ito sa tubig at hindi na lumutang.

Nadiskubre lamang itong nawawala nang mag-uuwian dakong ala-1:00 ng hapon.

Hinanap nila ang biktima at natagpuang nasa ilalim ng tubig sa ilog sa lalim na tatlong metro at wala nang buhay. (NILOU DEL CARMEN)