HINDI napigilang mapaluha ni presidential frontrunner Ferdinand ‘Bongbong’ Marcos matapos na abutan siya ng sobre na may lamang pera at liham ng pagsuporta ng isang matandang babaeng fish vendor habang nasa kalagitnaan ng campaign caravan sa Navotas City nitong nakalipas na Lunes.

Viral ngayon sa social media ang ginawang pag-abot ng sobreng may lamang pera ng isang fish vendor kay presidential frontrunner Ferdinand ‘Bongbong’ Marcos Jr. habang nasa kalagitnaan ng campaign caravan sa Navotas City nitong nakalipas na Lunes.

Ang naturang video na may daang libong likes at share na sa YouTube, Facebook at iba pang social media platform ay pinag-uusapan na rin ngayon ng mga overseas Filipino workers (OFWs).

“Nakakakilabot. Nakakaiyak. Kahit sino mata-touched sa ginawa ni Aling Clemencia,” ani Navotas Mayor Toby Tiangco.

Si Aling Clemencia ‘Inday’ Garcia ay isang fish vendor sa Navotas Fish Port.

“Mahirap lang ang pamilya nila kaya hahanga ka sa dedikasyon nilang tumulong kay BBM,” anang alkalde.

Kasama ni Marcos si Tiangco nang isagawa ang caravan sa kanilang lungsod.

Sinabi nitong pareho silang nagulat ni BBM nang may mag-abot ng sobre para sa standard-bearer ng Partido Federal ng Pilipinas (PFP).

“Na-stucked kami sa trapik. Hindi kami makaabante sa rami ng tao. Nang may mag-abot ng sobre, nagkatinginan kami ni BBM. Sabi namin buksan tapos nagulat kami nang may nakalagay na pera,” ani Tiangco.

Kaagad nilang hinanap ang babaeng nag-abot ng pera. Nawala umano ito sa mga nagsisiksikang crowd hanggang sa makita ng isa sa security ni Marcos.

Pilit isinasauli ni Marcos ang perang bigay ni Aling Clemencia, ngunit tumanggi ang ginang na tanggapin ito. “Hindi ko matatanggap ito,” ani Marcos.

“Tulong po namin iyan, sir. Hindi po mayor,” ani Aling Clemencia sa alkalde nang sabihin iyong sulat lamang nila kay Marcos ang tatanggapin at hindi na iyong bugkos ng pera.

“Okay lang sir. Pinaghirapan po natin [namin] sa isda iyan sir. Thank you po mayor, Tulong po namin iyan sir,” sabi ng ginang.

“Halika, mag-usap tayo. Iyong tulong n’yo sapat na iyon. Iyong boto n’yo sapat na iyon. Eto pinaghirapan n’yo to eh,” sabi ni Tiangco sa tindera.

“Para sa sambayanang Pilipino, Sir,” mangiyak-ngiyak na sabi ng ginang.

Sabi ni BBM: “Hindi ko gagamitin iyan.”

Sa huli, nanaig ang pakiusap nina Marcos at Tiangco na ibalik ang perang karamihan ay tig-P20, P50, at P100 bills na nakabalot sa isang rubber band.

“Alam mo iyong mga perang galing palengke. Hindi na namin binilang kasi sinoli namin. Pero makapal din. Siguro parang pinagpatong na cellphone ang kapal ng pera,” sabi pa ng alkalde.

Sa puntong iyon, nagsisigawan na ang mga tao na: “BBM! BBM! BBM!”

Narito ang kabuuang laman ng sulat ni Aling Nemencia kay Marcos.

Mahal na Pangulong BBM,

Magandang araw po, ako po si Gng. Clemencia ‘Inday’ Garcia ng Navotas, isa po akong tindira [tindera] ng isda sa fish port.

Tanggapin po ninyo ang aking kunting [kaunting] ambag sa inyong patuloy na pagtulong sa sambayanang Pilipino. Mabuhay po kayo at buong UNITEAM.

Mahal na mahal po naming [namin] kayo sampu ng aking pamilya Escarian at Garcia.

Gumagalang,

(Sgd) Clemencia Garcia
Marcos Loyalist Forever

Samantala, sinabi ni Tiangco na bukod sa sobreng mula kay aling Clemencia, marami ring Navoteño ang nagbigay ng gulay, patatas, isda, bulaklak at kahit milk tea kay Marcos.

“Ganyan kamahal ng mga taga-Navotas si BBM,” sabi pa ni Tiangco.

Nananatiling frontrunner sa pampanguluhan sa halalan sa Mayo si Marcos Jr. gayundin ang ka-tandem niyang si Inday Sara Duterte sa pagka bise presidente.

ILANG linggo na lamang bago ang halalan ay mas napatatag pa ni Marcos ang matibay na hawak sa kalamangan laban sa kanyang mga katunggali matapos na muling manguna sa pre-election poll na inilabas ng DZRH, isa sa pinakakilala at pinakikinggan na radio station sa buong bansa.

Base sa kanilang pinakabagong Desisyon 2022 survey na isinagawa noong Marso 12, 2022, nakakuha si Bongbong ng 49.8% na boto mula sa 7,566 na respondents.

Pinatotohanan ng survey na ito ang naunang nailabas na survey ng Pulse Asia kung saan nanatili ang malaking kalamangan ni Bongbong matapos makakuha ng 60% voter preference.

Matatandaan na sumalang si Bongbong sa ‘Bakit Ikaw? Presidential Job Interview’ ng DZRH kung saan napabilib niya ang taumbayan dahil sa kanyang intelektwal at malalim na sagot kung paano niya hahawakan at patatakbuhin ang pamahalaan matapos siyang magwagi sa darating na halalan sa Mayo 9.

Patuloy sa pangangampanya si Bongbong at kanyang running-mate na si Inday Sara sa iba’t ibang parte ng bansa upang ihatid nang direkta ang kanilang mensahe ng pagkakaisa at mga programa para sa mga Pilipino.

Ayon din sa survey, nasa malayong pangalawa si Leni Robredo na may 21.4%, Isko Domagoso 9.8%, Manny Pacquiao 8.0%, at Ping Lacson 4.7%.

Samantala, ang undecided o wala pa ring napipiling kandidato ay nasa 3.9%.