(Ni JOEL O. AMONGO)
Bumuo ng legal team ang Bureau of Customs (BOC) na siyang naatasang magrebisa sa posibilidad na pagdo-donate ng mahigit sa walong daang secondhand na mga sasakyan na nasabat sa loob ng Cagayan Economic Zone Authority (CEZA).
Naunang pinanindigan ng Korte Suprema ang constitutionality ng Executive Order No. 156, na nagbabawal ng importasyon ng mga secondhand vehicles sa bansa para palakasin ang local automotive industry at upang mapigilan ang smuggling.
Sa isinagawang BOC Executive Committee Meeting (EXECOM) noong Agosto 19, 2019, inireport ni District Collector Arienito Claveria ng Port of Aparri, Cagayan na ang ahensya ay nakipag-ugnayan sa CEZA management para sa disposisyon ng mga sasakyan na nasabat at nasa pangangalaga ng CEZA.
Magugunitang, sinabi ni Pangulong Rodrigo Roa Duterte na ang nasabat na mga sasakyan ay ipamahagi sa iba’t ibang ahensya ng gobyerno upang magamit kaysa sirain.
Ang pahayag ni Duterte, ay ginawa para matugunan ang kakulangan ng mga sasakyan ng iba’t ibang tanggapan ng gobyerno partikular ang mga nasa malalayong lugar.
Binigyang diin naman ni Deputy Commissioner Edward James Dy Buco ng BOC Assessment Operations and Coordination Group (AOCG) na ang pagbuo ng legal team ay para mapabilis ang pagtupad sa kautusan ng pangulo sa pagsasaayos at pamamahagi ng mga sasakyan sa mga kilalang opisina ng gobyerno na makikinabang tulad ng local government units (LGUs), Armed Forces of the Philippines (AFP), Philippine National Police (PNP), at iba pa.
Kaugnay nito, umaasa naman ang BOC na ang nasabing mga sasakyan ay magagamit pa ng maayos matapos dumating ang mga ito sa bansa limang taon na ang nakalilipas.
135
