KAPWA dumipensa ang Department of the Interior and Local Government (DILG) at Philippine National Police (PNP) laban sa editoryal ng isang broadsheet hinggil sa di umano’y pagtaas ng krimen sa bansa.

Sinabi ni DILG Assistant Secretary Maria Liavel Crisostomo na mariing itinatanggi ng departamento ang ‘shortcut, fear-driven approaches’ ng nakalipas na administrasyon, kabilang na ang extrajudicial killings, tungo sa paglikha ng police force na propesyonal, may pananagutan at may paggalang sa karapatang pantao at tuntunin ng batas.

“Following the directive of President Ferdinand R. Marcos Jr., and under the leadership of Secretary Juanito Victor “Jonvic” Remulla, we are reforming police leadership, strengthening discipline, and instilling a culture of service within the PNP,” ang sinabi ni Crisostomo sa isang kalatas.

Nakasaad sa The Philippine Daily Inquirer editorial na may petsang May 30, na may pamagat na “Deteriorating crime situation”, nahihirapan ang administrasyon na patunayan na ang tumataas crime situation ay isang “propaganda made up by trolls,” gaya ng sinabi ni Presidential Communications Office Undersecretary at Palace Press Officer Claire Castro.

Sinabi ni Crisostomo na ang pinaigting ang police visibility ay hindi para may makita lamang ang mga tao na pulis sa lansangan kundi para hadlangan ang krimen at muling itayo ang public trust.

Aniya sa Agosto, sisimulan na ng DILG ang pag-roll out ng 911 Emergency Response Program na may geolocation at live-streaming features para sa mas mabilis at mas wastong pagtugon sa krimen.

“President Marcos has already ordered the ban on POGOs to eliminate these threats and uphold public safety,” dagdag na wika nito.

(CHRISTIAN DALE)