MULING itinulak ni Sen. Grace Poe ang panukalang batas na magpapabilis at magpapagaan sa paraan ng pag-aasikaso ng gobyerno sa mga ordinaryong mamamayan gamit ang e-services para mawala na ang mahabang pila o matagal na oras nilang paghihintay.

Kahit sa bahay o trabaho, maaaring mag-aplay ang sinuman para sa mga benepisyo at makipagtransaksyon sa gobyerno gamit ang kanilang mobile phone o kompyuter, ayon sa Senate Bill No. 334 o ang panukalang E-Government Act ng 2022.

“Karapat-dapat na maranasan ng ating mga kababayan ang maginhawang pagtugon ng pamahalaan sa kanilang mga pangangailangan,” sambit ni Poe.

“Sa gitna ng bagong normal, higit na mahalaga ang mabilis at maaasahang paglilingkod ng mga sangay ng gobyerno sa ating mga mamamayan nasaan mang dako ng bansa,” dagdag ni Poe.

Iginiit ng senador na kinakailangan ang pagpapatupad ng e-government strategy na may seamless interoperability para sa kabutihan ng lahat.

Aatasan ng panukalang batas ni Poe ang Department of Information and Communications Technology (DICT) na magtatag at magsulong ng isang e-government master plan para sa paglulunsad ng mga online na serbisyo ng mga ahensya.

Bahagi ng master plan ang archive at records management system, online payment system, citizen frontline delivery services, at public finance management at procurement system.

“Ang paghihintay sa pila ng matagal para sa mga ayuda, benepisyo at iba pa ay hindi na dapat danasin ng ating mga kababayan, lalo na ng may kapansanan. Walang puwang ang anumang pahirap sa kamay ng pamahalaan,” dagdag ni Poe. (ESTONG REYES)