BUMAGSAK sa kamay ng pinagsanib na puwersa ng National Capital Region Police Office (NCRPO), Police Regional Office 4-A (PRO4-A) at Quezon City Police District (QCPD)-Crime Investigation Section (CIS), ang isang dating NBI agent at regional level top 1 most wanted person sa Brgy. Pasong Tamo, Quezon City noong Miyerkoles.

Kinilala ni QCPD Director, P/Brigadier General Danilo P. Macerin ang suspek na si Saul Hermano, 56-anyos, dating NBI special investigator agent 3 na nag-AWOL noong 2009, tubong Gamay, Northern Samar at residente sa Brgy. San Roque, Marikina City.

Naaresto si Hermano dakong alas-5:00 ng umaga noong Disyembre 9 sa Chestnut Drive, Brgy. Pasong Tamo, Quezon City.

Si Hermano ay natala bilang no.1 most wanted person regional level noong 2015 para sa kasong murder (2 counts) at may warrant of arrest na inisyu ni Hon. Leandro C. Catalo, Acting Presiding Judge ng Branch 256, Regional Trial Court (RTC) ng Muntinlupa City at walang inirekomendang piyansa para sa suspek. (JOEL O. AMONGO)