TARGET ni KA REX CAYANONG

ISANG makabuluhang hakbang tungo sa mas maayos na serbisyong pangkalusugan ang isinagawa kamakailan sa Barangay San Cristobal, San Pablo City, sa pamumuno ni Chairman Bembong Felismino at Bokal Bhenj Felismino, katuwang ang buong Sangguniang Barangay.

Sa pormal na turnover ng mga pangunahing suplay ng gamot para sa San Cristobal Health Center, muling pinatunayan ng lokal na pamahalaan na ang kalusugan ng mamamayan ay isang prayoridad at hindi maaaring isantabi.

Hindi biro ang epekto ng kawalan ng access sa gamot, lalo na para sa mga kapus-palad na hindi kayang bumili ng kanilang pang-araw-araw na kailangan.

Kaya naman ang pagkakaloob ng sapat na suplay ng medisina sa barangay health center ay hindi lamang isang simpleng programa, ito ay isang konkretong tugon sa matagal nang pangangailangan ng taumbayan. Isa itong paalala na sa gitna ng krisis sa kabuhayan at patuloy na hamon sa kalusugan, may mga lider pa ring kumikilos para sa kapakanan ng lahat.

Kahanga-hanga rin ang isinagawang “People’s Day” sa tanggapan ng Punong Barangay na siyang naging daan upang direktang marinig ang hinaing at saloobin ng mamamayan.

Aba’y sa pamamagitan ng aktibidad na ito, mas naramdaman ng komunidad ang malasakit at pagbibigay-halaga sa kanilang mga tinig. Ito ang tunay na mukha ng serbisyong publiko—bukas, taos-puso, at nakatuon sa aksyon.

Hindi rin maikakaila ang malaking tulong na hatid ng rescue vehicle na ibinigay ni Congressman Amben Amante. Sa panahong ang mabilisang tugon sa mga sakuna at emergency ay mahalaga, ang pagkakaroon ng ganitong sasakyan ay literal na maaaring makapagliligtas ng buhay. Isa itong halimbawa ng mahusay na ugnayan ng lokal at pambansang liderato na sabay-sabay na kumikilos para sa iisang layunin—ang kapakanan ng tao.

Ang mga serbisyong ipinakikita sa Barangay San Cristobal ay larawan ng epektibong pamamahala at tapat na paglilingkod. Sa bawat gamot na naipamamahagi, sa bawat hinaing na natutugunan, at sa bawat tulong na naihahatid, muling naitataguyod ang tiwala ng mamamayan sa kanilang mga pinuno.

Nawa’y magsilbi itong inspirasyon sa iba pang barangay at lokal na pamahalaan na sa simpleng pagkilos at taos-pusong malasakit, maaaring makapagdulot ng tunay na ginhawa sa buhay ng bawat Pilipino.