(NI BERNARD TAGUINOD)

MISTULANG lalong sumama ang loob ng mga guro sa Department of Education (DepEd) dahil bukod sa habang nagkukuripot ang ahensya sa hinihingi nilang dagdag sahod ay nabukong nagsasayang ang mga ito ng pondo.

Ayon sa Alliance of Concerned Teachers (ACT) na kinakatawan ni Rep. France Castro sa Kamara, habang sinasabi ng DepEd na walang pera para sa dagdag na pondo ay nabuko ang bilyung-bilyong piso na ayaw gastusin at nasasayang pera ng bayan.

Ginawa ng grupo ni Castro ang pahayag matapos lumabas sa report ng Commission on Audit (COA) na mayroong P13.9 bilyon ang ilegal o walang sapat na dokumento na ginastos umano ng DepEd.

Bukod dito ang P15.4 bilyon na hindi umano ginamit ng ahensya sa iba’t ibang proyekto; P2.7 bilyon  unliquidated cash advances; P254 Million halaga ng kuwestiyunableng textbook contracts, P113.7 million halaga ng libro na hindi ipinamiga at  P1.25M payment of voucher sa umano’y  ‘ghost’ beneficiaries”.

“We have always been told that there are not enough funds—for classrooms, for books, for materials, for pay hike—and that we have to be forbearing and resourceful. The COA report now shows the hypocrisy in our situation,” ani Jocelyn Martinez, chairperson ng nasabing grupo.

Dahil dito, hindi umano palalagpasin ng nasabing grupo ang anomalyang ito sa DepEd at kailangang mayroong managot dahil habang naghihirap ang mga public school teachers at mga estudyante ay maraming pera ang sinasayang ng nasabing ahensya.

Ang mga public school teachers ay humihingi ng P31,000 na entry level salary mula sa kasalukuyang P20,000 lamang at mga dagdag na silid aralan para sa mga estudyante subalit lagi umanong sagot ng DepEd ay walang pera.

“For every peso that the DepEd expends irresponsibly, there are students and teachers who bear the brunt of this imprudence. This is plainly unacceptable and those responsible should be held liable for this,” ani Martinez.