PINANGUNAHAN ni Manila Mayor Francisco “Isko Moreno” Domagoso at District Director P/Brigadier General Leo “Paco” Francisco ang paggawad ng parangal kay P/Major Rosalino Ibay Jr. sa Manila Police District Headquarters sa United Nations Avenue, Ermita, Manila nitong Lunes.

Si Major Ibay Jr., hepe ng MPD-Special Mayor Reaction’s Team (MPD-SMaRT) ay una nang pinarangalan, na pinangunahan ni Pangulong Rodrigo Roa Duterte bilang “Presidential Lingkod Bayan Award 2020”.

Idinaos ang simpleng seremonya nitong Lunes ng hapon sa tanggapan ni Margarita Reyes, Civil Service Commission (CSC) Director II.

Iginawad ang plaque ng parangal na “Presidential Lingkod Bayan Award Regional Winners for 2020” na dinaluhan ni MPD-Chief District Director P/BGen. Leo Francisco, mga piling kaibigan at kawani ng CSC, kay Major Ibay bilang pagkilala sa mga nagawa niya bilang isang masipag at episyenteng ‘law enforcer’ sa buong Philippine National Police (PNP). (RENE CRISOSTOMO)