MULING lumutang ang bulung-bulungan sa pagbaba sa pwesto ni Health Secretary Francisco Duque na matagal nang ipinasisibak sa pwesto bunsod ng mahabang talaan ng bulilyasong kinasasangkutan ng kanyang departamento.
Sa lingguhang pulong ng mga kalihim sa Palasyo, hayagang inalok ni Pangulong Rodrigo Duterte ang pwesto ni Duque kay Nicanor Austriaco ng OCTA Research Group.
Gayunpaman, hindi malinaw kung nagbitiw na si Duque o sadyang nahimasmasan na ang Pangulo sa problemang idinulot ng kontrobersyal na departamento.
Ang siste, mukhang palusot lang – kung hindi man drama lang ang eksena sa Palasyo sa hangaring magpaandar sa publiko tulad ng kanyang nakagawian sa haba ng kanyang termino.
Kung tutuusin magandang balita ang pag-alis ni Duque sa kagawaran. Subalit sa isang banda, parang hindi angkop na pababain na lang ang Kalihim nang hindi nananagot sa kapalpakan ng departamento.
Bago pa man inalok ng Pangulo ang pwesto ni Duque, naglabas ng panibagong pasabog ang Commission on Audit (COA) kaugnay ng iregularidad sa Interim Reimbursement Mechanism (IRM) ng Philippine Health Insurance Corporation (PhilHealth).
Ayon sa COA, malinaw na ilegal ang pagbibitaw ng halos P15 bilyong pondo ng PhilHealth sa mga pribadong ospital kahit pa sa gitna ng isang national health emergency. Hindi anila pinahihintulutan ang advance payment sa ano mang pribadong kumpanya hangga’t hindi pa na-deliver ang serbisyo o suplay batay sa kontratang nilagdaan sa gobyerno.
Hindi usapin kung liquidated na ang paggastos ng pondo. Ang problema, ayon sa COA, ay ang garapalang paglabag sa batas.
Kung tutuusin, maganda naman ang pakay ng IRM. Sa ilalim kasi ng nasabing mekanismo, garantiya ng agarang tugon sa sandaling higit na angkop ang agarang gamutan, tulad na lamang ng mga pasyenteng tinamaan ng nakamamatay na COVID-19.
Ang nakalulungkot, mukhang iwas-pusoy ang diskarte sa pagbaba ni Duque sa pwesto.
Sabi nga ng Pangulo noong siya’y maupo sa pwesto – “not even a whiff of corruption.”
163
