PINAKAKASUHAN hindi lamang sina Health Secretary Francisco Duque at dating Philippine Health Insurance Corporation (PhilHealth) president and CEO Ricardo Morales kundi ang lahat ng mga miyembro PhilHealth board na kinabibilangan ng 4 pang secretaries dahil sa Interim Reimbursement Mechanism (IRM) scam.

Kasong paglabag sa Section 3 ng Republic Act (RA) No. 3019 o Anti-Graft and Corrupt Practices Act at Article 220 ng Revised Penal Code sa “illegal use of public funds” ang inirekomenda ng House committee on public accounts na pinamumunuan ni Anakalusugan party-list Rep. Mike Defensor at Committee on good government and public accountability ni Bulacan Rep. Jonathan Sy-Alvardo laban kina Duque at Morales.

Bukod sa dalawa, inirekomenda rin ng joint committee ang pagsasampa ng kahalintulad na kaso laban sa iba pang miyembro ng PhilHealth board kabilang sina Deparment of Labor and Employment Secretary Silvestre Bello III, Department of Social Welfare and Development (DSWD) Secretary Rolando Bautista, Department of Budget and Management (DBM) Secretary Wendel Avisado at Department of Finance (DOF) Secretary Carlos Diminguez.

Kasama rin sa pinasasampahan ng kaso ang mga opisyal ng PhilHealth na sina Arnel de Jesus, Israel Pargas, Rodolfo del Rosario at Rogelio Pocallan Jr., dahil sa isyu ng IRM.

Bukod sa mga nabanggit, sasampahan din ng hiwalay na kaso ang iba pang PhilHealth officials sa iba pang anomalya na nangyari sa kanilang ahensya tulad ng all case rate, pagkolekta ng sobra-sobrang premium sa Overseas Filipino Workers, hindi pagsunod sa kautusan ng korte na patawan ng 3 buwang suspensyon ang Perpertual Succor, paggamit bilang allowance sa nakolektang accreditation fees ng mga pagamutan at mga doctor at iba pa.

Una nang kinontra ni Kabayan party-list Rep. Ron Salo na isama ang PhilHealth board kung saan chairman si Duque sa kakasuhan kaya naghain ng omnibus motion si Alvarado subalit natalo sa botohan.

Samantala, upang mapabilis umano ang pagreporma at paglilinis sa PhilHealth laban sa mga tiwali, inirekomenda ng dalawang komite na bigyan ng extra power si Pangulong Rodrigo Duterte at maging ang presidente ng PhilHealth.

“To make it more effective, innovative and responsive to its current problems and concerns as regards sustainability of funds and issues regarding graft and corruption, among others,” ani Defensor. (BERNARD TAGUINOD)