TIYAK na mga programa para sa kapakanan at karapatan ng mga QCitizen ang ibinahagi ni Mayor Joy Belmonte sa pagbisita nina Dutch Human Rights Ambassador Her Excellency Bahia Tahzib-Lie at Dutch Ambassador to the Philippines H.E. Marielle Garaedts sa Quezon City Hall kamakailan.
Ipinaliwanag ni Mayor Joy kung paano pinoprotektahan ng lungsod ang karapatang pantao, tulad ng pagtatatag ng community-based treatment and rehabilitation program para sa mga drug dependent, at pagsasabatas ng QC Gender Fair Ordinance.
Ibinida rin ng alkalde ang mga pasilidad ng QC para sa mga vulnerable sector tulad ng Quezon City Protection Center, Bahay Kanlungan, Bahay Aruga, at Molave Youth Home. Ipinaliwanag niya ang No Woman Left Behind Program para sa Persons Deprived of Liberty (PDLs).
Bumisita rin sila sa QC Female Dormitory at pumunta sa mga pasilidad nito tulad ng Mother and Child area, Livelihood shop, at Workshop area.
Kasama ni Mayor Joy na sumalubong sa mga delegado mula sa The Netherlands, sina QC Tourism Department OIC Tetta Tirona, Gender and Development TWG Office chief Janet Oviedo, Spark! Philippines Executive Director Maica Teves, at QC Female Dormitory Jail Warden JSupt. Maria Ignacia Monteron.
Matatandaan, kamakailan ay lumagda sa Sister City Agreement sina Mayor Belmonte at Rishon LeZion Mayor Raz Kinstlich ng bansang Israel.
Noong Martes ng hapon, Hunyo 6, 2023 bumisita naman sa Quezon City ang ilang opisyal ng Israel.
Mainit na tinanggap ng pamahalaang lungsod sa pangunguna ni Mayor Belmonte, si Foreign Minister of Israel His Excellency Eli Cohen sa Philippine-Israel Friendship Park sa Quezon Memorial Circle.
Ang naturang park ay itinayo bilang simbolo ng pagkakaisa ng Pilipinas at Israel lalo na noong malugod na tinanggap ni Pangulong Manuel Quezon ang 1,300 Jewish refugees sa bansa.
Kabilang sa mga bumisita ay sina Israel Ambassador to the Philippines H.E. Ilan Fluss, Amb. Yosef Amrani, Director of Foreign Minister Diplomatic Bureau, at Amb. Rafael Harpaz, Deputy Director General for Asia and Pacific Affairs.
Dahil dito, inaasahan na lalo pang dadami ang investors sa Lungsod Quezon sa darating na mga panahon.
(JOEL O. AMONGO)
276 
