PINAWI ng Malakanyang ang pangamba ng ilang Local Government Units (LGUs) na magamit sa pulitika ang pamamahagi ng bakuna lalo pa’t nalalapit na ang halalan sa bansa.

Pinangangambahan kasi ng mga hindi kaalyadong LGU o sinomang makakalaban sa 2022 ng administrasyon na baka hindi sila makasama sa prayoridad ng vaccine program ng pamahalaan.

Tiniyak ni Presidential spokesperson Harry Roque na hindi uubrang magkaroon ng diskriminasyon sa pagbabakuna dahil kokontra ito sa inaasam-asam na target ng vaccination program ng gobyerno.

Sinabi ng kalihim na kailangan lamang pairalin ang patas na pagpigil sa pagkalat pa ng virus na magagawa sa pamamagitan ng pagbabakuna sa lahat at hindi lang sa mga taga- suporta ng administrasyon.

Giit ni Sec. Roque, hindi katulad ng ilang nakaraang administrasyon, ang kasalukuyang pamahalaan at si Pangulong Duterte aniya ay presidente ng lahat ng mga Filipino.