SA kabila ng kanyang pagkabigong makamit na muli ang korona ng super-welterweight na binawi sa kanya ng World Boxing Association pitong buwan ang nakalilipas, balak bigyan ng nasabing organisasyon si eight-division world champion Manny Pacquiao ng karangalang “Champion for Life” sa ika-100 taong anibersaryo nito.
Sa ulat ng mga foreign news service, sinabi mismo ito ni WBA president Gilberto Mendoza Jr. matapos makipagkita sa Pambansang Kamao, makaraang talunin ito ng Cubanong si Yordenis Ugas noong nakaraang Linggo (Sabado sa Amerika) sa T-Mobile Arena sa Las Vegas.
Base sa kumalat na video sa social media at sa ulat ng Agence France-Presse (AFP), humingi ng tawad si Mendoza kay Pacquiao, sa harap ni MP Promotions president Sean Gibbons, sa kalituhang naganap sa pagkakatanggal ng WBA crown sa 147 libra sa fighting senator.
Kaugnay ito sa pagtatalaga kay Pacquiao na “champion in recess” dahil sa kawalan ng aktibidad mula noong 2019 dala ng pandemya (COVID-19) at ibinigay ang titulo nito kay Ugas “on a silver platter,” ika nga.
Sa paghahangad na mabawi ang kampeonato, pumirma si Manny ng kontrata para labanan si Errol Spence Jr. para pag-isahin ang WBC/IBF na hawak ng huli.
Ngunit 10 araw bago ang labang Pacquiao-Spence, nagkaroon ng pinsala sa mata ang Amerikano at ipinalit si Ugas
bilang bagong kalaban.
Tinalo ng Cubano ang ipinagmamalaki ng Pilipinas sa nagkakaisang hatol para maidepensa ang korona at maging ligal ang pag-upo niya sa tronong ibinigay sa kanya gratis et amore.
Para sa marami, ang Champion for Life ng WBA ay pa-konsuelo de bobo kay Manny lalo’t ‘itinapon nito sa basurahan’ ang apela ni Pacman na maibalik sa kanya ang titulo.
“I was fooled but I’m sorry about it. But anyway, I have to do it personally Manny coz you have behaved like a real gentleman and you teach a lesson to others,” wika ni Mendoza.
“You’re going to be a champion for life and you know, I have a belt that’s made and it’s going to come with a resolution afterward. I hope to see you soon Manny, with the belt and everything else. It’s a new one,” dagdag na sabi ng WBA big boss.
Ayon naman kay Pacquiao, hindi na kailangan ni Mendoza na humingi ng kapatawaran. “Mendoza doesn’t owe any apology since he’s just doing his job as president of the WBA, which is commemorating its centennial year.”
Hinggil naman sa napaulat tungkol sa kanyang pagreretiro, ipinahayag ni Pacquiao na kailangan muna niyang lubusang makapagpahinga at makapag-isip bago siya magdedesisyon sa mga susunod niyang hakbang, maging ng kinabukasan niya sa pulitika.
145 
