INIHINTO na ang joint search and rescue operations para sa lumubog na MBCA Amejara na naiulat na nawawala sa karagatan ng Davao Gulf noong Enero 19, 2026.

Ayon sa Philippine Coast Guard Coast Guard District Southeastern Mindanao, ginamit ang lahat ng available surface, aerial at coastal monitoring assets kabilang ang drift path analysis batay sa lagay ng panahon at oceanographic assessments.

Isang survivor ang nailigtas sa isinagawang operasyon.

Natapos ang aktibong search noong Pebrero 18, 2026 matapos ang masusing operational assessment.

Nakipagtulungan sa operasyon ang Office of Civil Defense, Naval Forces Eastern Mindanao, Eastern Mindanao Command, Philippine Air Force-Tactical Operations Wing Eastern Mindanao, PNP Maritime Group, DSWD, DOH, National Bureau of Investigation, DILG, mga LGU, volunteers at maritime stakeholders.

Nagpahayag ng pakikiramay ang Coast Guard sa mga pamilya ng mga nawawala pa rin at tiniyak na tatanggapin at tutugunan pa rin ang anomang impormasyon kaugnay sa insidente.

(JOCELYN DOMENDEN)