BIGO pa rin si Filipino-American shot putter William Morrison III na maabot ang Olympic Qualifying Standard na 21.10 metro sa sinalihang Vanderbuilt Invitational sa Nashville, Tennessee.

Ngunit gumawa naman siya ng bagong Philipine at Southeast Asian Games records nang magtala ng 19.17 metro sa men’s shot put.

Ang hagis ni Morrison sa Vanderbuilt Invitational ay tumabon sa dating 16.74m record ng Filipino shot putter na si Eleazar Sunang.

Binura din nito ang dating SEA Games record ni Chatchawal Polyam ng Thailand na 17.74m na itinala noong 2011 SEA Games.

Tinabunan din nito ang National Indoor record ni Jesson Ramil Cid na 11.35m noong magkampeon sa 2013 SEA Games Decathlon.

Ang 6’foot-3 na si Morrison ang unang Pilipino sa kasaysayan ng biennial meet na nagawang magwagi ng gintong medalya sa men’s shot put noong 30th  SEAG na isinagawa sa New Clark City nang makapaghagis ng 18.38 metro.

Pumangalawa lang si Morrison, na nirepresenta ang City if Indiana sa Vanderbuilt Invitational, sa tinanghal na kampeon na si David Plesh na nagtala ng 19.36m.

Sa kabila nito, hindi nawawalan ng pag-asa ang Fil-Am shot putter na mag-qualify sa 2020 Tokyo Olympics.

Mayroon pa si Morrison, at iba pang Filipino athletes, na ilang buwan para maabot ang OQS  at makakuha ng tiket papuntang Summer Games sa Tokyo sa Hulyo.   (ANN ENCARNACION)