KINILALA ang pamahalaang lungsod ng Navotas dahil sa patuloy na pagpapatupad ng Manila Bay Clean up, Rehabilitation and Preservation Program (MBCRPP).
Umiskor ng 96.7% ang lungsod at tinanghal na 2020 Most Compliant Local Government Unit sa pagpapatupad ng continuing mandamus ng Korte Suprema sa pagpapanatili ng kalinisan sa nasabing baybayin.
“In the past years, Navotas scored low in the MBCRPP. We strived to rework our priorities, strengthen our partnership with environmental organizations and agencies, and establish institutional changes to ensure that we will not just be compliant but committed in the rehabilitation of Manila Bay,” ani Mayor Toby Tiangco.
Nakakuha ang Navotas ng 100% iskor sa informal settler families cluster at information, education and communication campaign; at 97% sa solid waste management cluster, habang 92% sa liquid waste management cluster.
Kabilang sa mga priyoridad sa pag-unlad ng lungsod ang pagbibigay ng disenteng pabahay para sa mga nasasakupan nito, lalo na ang informal settler families na naninirahan sa danger zones.
Bukod sa off-city resettlements ng National Housing Authority, ang Navotas ay may anim na housing projects na may 2,595 units.
Nakipagtulungan din ang lungsod sa Mother Earth Foundation, na tumulong sa pagtaguyod nito ng isang phased, low-cost at community-centered zero waste program. (ALAIN AJERO)
474 
