TARGET ni KA REX CAYANONG

NAGLALARO sa puso ng mamamayan ng Camarines Norte, lalo na sa mga bayan ng Basud at Paracale, ang kagalakan at pagmamalaki dahil sa tagumpay na tinamasa ng kanilang lokal na pamahalaan. Ang pagkakamit ng 2023 Seal of Good Local Governance ay hindi lamang tagumpay para sa kanilang mga lider, kundi para sa lahat ng mamamayan na nag-aambag sa pag-usbong at tagumpay ng kanilang komunidad.

Sa kabuuang 493 Local Government Units (LGU) na iginawad ang prestihiyosong parangal na ito, lalong nagiging kakaiba at espesyal ang pag-angat ng Camarines Norte, kasama na ang mga bayang Basud at Paracale. Ang pagtanggap ng parangal na ito ay hindi lamang isang sertipikasyon ng kanilang matibay na liderato kundi patunay rin sa kanilang sipag, dedikasyon, at pagsusumikap na magsilbing huwaran sa mahusay at tapat na pamamahala.

Ang Seal of Good Local Governance ay nagpapakita ng kakayahan ng isang lokal na pamahalaan na magtagumpay sa iba’t ibang aspeto ng serbisyo publiko. Ito ay hindi lamang simpleng pagkilala; ito ay isang saksi sa kanilang husay sa pamamahala, sa pagtutok sa mga proyektong makikinabang ang nakararami, at sa pagsusulong ng katarungan at katiwasayan.

Ayon kay CamNorte Gov. Ricarte “Dong” Padilla, ang awarding ceremony na magaganap sa December 13 at 14, 2023, ay hindi lamang isang pagkakataon para sa pagtanggap ng tropeo o plake, kundi isang pagdiriwang ng tapat at mahusay na pamamahala.

Samantala, sa kaharian ng mga alon at karagatan, nakasalalay sa pangingisda ang ikabubuhay ng marami sa ating mga kababayan sa lalawigan ng Camarines Norte. Ang malasakit ng pamahalaang panlalawigan, sa pangunguna ng Office of the Provincial Agriculturist (OPAG) sa ilalim ng liderato nina Engr. Almirante Abad at Ma’am Melinda Jerez, kasama ang Provincial Agri-Extension Office (PAO) na pinamumunuan ni Sir Romeo Pidoc, ay lubos na napamahagi sa isang makasaysayang pagdiriwang ng pag-angat sa industriya ng pangingisda.

Sinabi ni Padilla na may kabuuang 110 individual fisherfolks ang nabiyayaan ng tulong tulad ng lambat at iba pa. Ang 56 mula sa bayan ng Mercedes, Daet, Talisay, at Paracale ay tumanggap ng lambat, samantalang ang 54 mula sa mga bayan ng Mercedes, Jose Panganiban, Vinzons, Sta. Elena, Talisay, Labo, Capalonga, Daet, Basud, at Paracale ay napagkalooban din ng mga materyales para sa bangka.

Hindi matatawaran ang pasasalamat na nararapat sa mga opisyales at kawani ng pamahalaang panlalawigan, OPAG, at PAO sa kanilang mabilis at epektibong pagtugon sa pangangailangan ng ating mga mangingisda.

Sa pamamagitan ng pagbibigay ng karampatang kagamitan, malinaw na ipinapakita ng lokal na pamahalaan ang kanilang dedikasyon na itaguyod ang kapakanan ng sektor ng pangingisda sa CamNorte.

Hinikayat naman ni Padilla ang mga benepisyaryo ng programa na gamitin nang maayos ang mga natanggap na tulong.

Aniya, sa pamamagitan ng pagiging responsable sa paggamit ng lambat at materyales, magiging mas epektibo ang mga mangingisda sa kanilang paglalakbay sa karagatan.

Nawa’y patuloy ang pag-unlad ng sektor ng pangingisda sa CamNorte at maging inspirasyon sa iba pang lalawigan na maglaan ng sapat na suporta para sa kapakanan ng kanilang mga mangingisda.