ROLL VTR Ni VT ROMANO

NASAKSIHAN natin ang pagmamahal ng isang ama sa Terence Crawford- Shawn Porter fight kamakalawa ng gabi.

Pagmamahal na hindi kayang tumbasan ng materyal na bagay sa mundo.

Maaaring hindi sang-ayon ang ilang nakasaksi sa ginawang paghagis ng towel ni Kenny Porter sa 10th round. Wala siyang pakialam sa sasabihin o opinyon ng iba. Ang mahalaga sa kanya ­maprotektahan ang anak na si Shawn. Maprotektahan mula sa malulupit na suntok ni Crawford.

Sa mga sandaling iyon, hindi bilang isang chief trainer si (Kenny) Porter, kundi isang ama.

Bilang ama, sapat na ang kanyang nakita, kaya sa pangalawang bagsak ng anak, nagpasya siyang itigil ang laban. Tama na! Awat na!

Hindi naman nag-atubili ang reperi at agad itinigil ang laban.

Wagi si Crawford via 10th round TKO at wala pa ring mantsa ang record niya (38-0, 29KOs).

Ito naman ang unang pagkakataong nakalasap ng knockdown si Porter (32-4-1, 17KOs) sa kanyang boxing career.

Hindi lang sa larangan ng boxing, kundi sa iba pang sports at maging sa normal na buhay, hindi matitiis ng amang makitang nasasaktan ang anak.

Mas gugustuhin pa nilang sila ang masaktan o ‘di kaya’y sila ang makipagsuntukan, kapag may kaaway ang anak.

Ganoon ang ama.

At ganoon ang ipinakita ni (Kenny) Porter nang awatin niya ang anak sa pakikipagsuntukan kay Crawford.

Nag-alala si (Kenny) Porter sa posible pang kasapitan ng anak kung ipinagpatuloy pa ang ­huling dalawang rounds.

Kaya naman, walang pagsisising narinig mula kay (Shawn) at sinang-ayunan niya ang ama sa naging desisyon nito.

***

BIGLANG pumasok sa isip natin si Sen. Manny Pacquiao at anak na si Jimuel (Emmanuel Pacquiao Jr.).

Nasa Amerika pa si Jimuel ngayon at nagsasanay. Desidido ang binatilyong sundan ang yapak ng boxing legend na ama, na kareretiro lang nitong Setyembre, matapos ang pagkatalo kay Yordenis Ugas noong Agosto.

Ang sabi ni Sen. Pacquiao, ayaw nilang payagan ni Jinkee si Jimuel magboksing. Pero, hindi nila mapigilan. Kaya’t ibinigay nila ang basbas dito.

Paano kung dumating ang oras na maging full-time boxer si Jimuel at lumalaban na?

Makayanan kaya ni Sen. Pacquiao makitang nasasaktan ang anak?

Gawin din kaya ni Sen. Pacquiao ang ginawa ni Kenny Porter?

Tingin ko, gagawin din ni Sen. Pacquiao. Ihahagis din niya ang towel para itigil ang laban.

Dahil ama rin siya at hindi niya kakayaning makitang nasasaktan ang anak.

Sa totoo lang, may mga trainer na parang anak ang turing sa boxer. Nakikita nila kung nasasaktan ang kanilang alaga at kung kailangan bang magdesisyon silang awatin ang laban.

Dahil para sa kanila, marami pang laban, makakabawi pa.