IGINIIT ni Cagayan de Oro Rep. Rufus Rodriguez na dapat ibalik ng gobyerno hindi lang ang P60 bilyong pondo ng PhilHealth, kundi pati ang P107 bilyong kinuha sa Philippine Deposit Insurance Corp. (PDIC) matapos ideklarang unconstitutional ng Korte Suprema ang paglipat ng PhilHealth funds sa National Treasury (NTr).

Ayon kay Rodriguez, proteksyon ng bank depositors ang nakumpiskang pondo at hindi dapat ginamit ng gobyerno sa ibang layunin.

“The P107 billion is intended for bank deposit insurance coverage. Its transfer to the national government prejudiced millions of bank depositors,” mariing pahayag ni Rodriguez, kasunod ng deklarasyon ng SC na labag sa Saligang Batas ang probisyon sa 2024 GAA at DOF circular na nag-oobliga sa GOCCs na iremit sa NTr ang sobra nilang pondo.

Bukod sa PhilHealth at PDIC, isiniwalat ng kongresista na tinarget din umano ang pondo ng ilang GOCCs kabilang ang Philippine Ports Authority (PPA), Philippine Reclamation Authority (PRA), TransCo, Philippine National Construction Corp., Southern Philippines Development Authority, Laguna Lake Development Authority, Cebu Ports Authority, APO Production Unit, at Center for International Trade Expositions and Missions.

Wala pang detalye kung magkano ang na-remit mula sa mga naturang ahensya, pero giit ni Rodriguez, obligado nang ibalik ang pera dahil malinaw ang desisyon ng Korte Suprema sa kaso ng PhilHealth.

Sinabi pa ng kongresista at iba pang mambabatas na nagwagi ang taumbayan sa desisyong ito, lalo na’t pera ng mga naghihirap na pasyente ang dapat na napakinabangan.

“The SC ruling is a victory for millions of Philhealth members who were deprived of P60 billion, which should have been used for new or increased benefits,” diin ni Rodriguez.

Sinang-ayunan ito ni Mamamayang Liberal (ML) party-list Rep. Leila de Lima na nagbabala pa laban sa maling paggamit ng health funds.

“Babantayan natin ito. Bawat sentimo ng pondo para sa kalusugan, dapat gamitin sa serbisyong pangkalusugan — hindi sa guni-guning imprastraktura, hindi sa anomalya, hindi sa walang kwentang programa,” ani De Lima.

(BERNARD TAGUINOD)