BAGAMA’T unti-unti nang nakababangon ang mga lugar na tinamaan ng magkakasunod na bagyong Rolly at Ulysses sa Luzon, tuluy-tuloy lang ang pagpapaabot ng tulong ng isang foundation.

Ayon kay Atty. Caroline Cruz, ng Pitmaster Foundation Inc., aabot sa higit P21 milyon ang naiparating na sa mga LGU ng Cagayan, Isabela at NCR noong Nobyembre at ngayong Disyembre.

“Layunin lang po namin na makatulong sa mga LGU hanggang sa muling makatayo sa sarili nilang mga paa ang kanilang mga constituents na pinadapa ng magkakasunod na kalamidad,” ani Atty. Cruz.

Daan-daang sako at mga kahon ng mga pagkain ang inihatid ng Pitmaster Foundation sa Cagayan at Isabela, at maging sa ilang lungsod sa Metro Manila, kabilang na ang Marikina, nitong mga nagdaang araw.

Unang ipinamahagi ang mga pagkain at hygiene kits sa Isabela at Cagayan noong Nobyembre na umabot sa P15 milyon ang halaga.

Sinundan pa ito ng pamamahagi muli ng relief goods ng Pitmaster sa NCR na aabot naman sa P6 milyon noong unang linggo ng Disyembre.

Sumama rin ang aktor na si Arjo Atayde sa pag-turnover ng relief goods at food packs sa lalawigan.

Dagdag pa ni Cruz, “Pinaghahandaan na rin ng Pitmaster ang pamamahagi ng mga noche buena baskets sa mga LGU sa darating na linggo para sa mga mahihirap nilang kababayan.”

TINURN OVER ni Pitmaster Foundation Program Director Atty. Caroline Cruz (kanan) kay Isabela Gov. Rudito Albano (gitna) ang relief goods. Sumama rin ang aktor na si Arjo Atayde (kaliwa) para sa relief distribution.