NANGANGAMOY away sa mababang kapulungan ng Kongreso matapos patulan ng isang dating mambabatas ang patutsada ni Camarines Sur Rep. LRay Villafuerte na may kinalaman sa Speakership sa Kongreso ang pagkalkal sa P11.8 billion na makukuha umano ng Camarines Sur sa 2021 national budget.

Una rito, kinuwestiyon ni Negros Oriental Rep. Arnolfo Teves sa budget hearing ng Department of Public Works and Highways (DPWH) ang impormasyon nito na ang Camarines Sur at Taguig City ang may pinakamalaking pondo sa mga proyekto sa susunod na taon.

“Tsismis lang naman, ma-confirm kung totoo ba na ang Taguig City is getting more than eight billion and ang CamSur is getting eleven point eight billion. I just like a confirmation dahil wala naman akong kumpletong datos,” ani Teves.

Mistulang hindi ito nagustuhan ni Villafuerte at inakusahan nito si Teves na protégé ni dating Negros Occidental Rep. Albee Benitez na king maker umano ni incoming House Speaker Lord Allan Velasco.

“My challenge to LRay Villafuerte. Put your money where your mouth is. You accuse Cong. Teves of making accusations based on hearsay but what you are doing is worse. Totally baseless and a figment of your overactive and defensive imagination,” ani Benitez.

Kung wala umanong itinatago si Villafuerte ay dapat nitong ipaliwanag kung bakit ang national government ang gumagastos sa konstruksyon ng Camarines Capitol Building na nagkakahalaga ng P420 million.

“Sa panahon ng COVID-19, where resources are scarce and people are struggling to survive, it is only right that we demand answers to legitimate questions. If the good congressman is morally certain that his budget will pass the public’s scrutiny, then prove us all wrong. Be transparent with your own district’s budget. Account for every peso and centavo,” ayon pa sa dating mambabatas.

Sa mga nakaraang budget, laging nasasabit ang pangalan ni Villafuerte na isa sa mga may pinakamalaking pondo umanong nakukuha habang mga barya lamang sa ibang distrito na kinakatawan ng mga hindi kilalang mambabatas at hindi maiingay sa Kongreso. (BERNARD TAGUINOD)