NAGHAIN ng resolusyon ang tatlong kongresista upang imbestigahan ang umano’y pagdurusa ng mga pasahero dulot ng palpak na serbisyo ng ilang airline companies, kabilang ang madalas na flight delays at kanselasyon ng biyahe, gayundin ang pagtaas ng pamasahe.

Sa House Resolution No. 3303 na inakda nina 1Tahanan party-list Rep. Nathan Oducado, Kamanggagawa party-list Rep. Eli San Fernando, at Northern Samar Rep. Nikko Daza, layon ding alamin kung maayos na naipatutupad ang mga umiiral na batas na nag-aatas sa mga airline na magbigay ng tulong at kompensasyon sa mga pasaherong apektado ng pagkaantala o kanselasyon ng biyahe.

Ayon sa mga mambabatas, karaniwang kaakibat ng peak travel seasons ang pagdami ng reklamo kaugnay ng bigla at labis na pagtaas ng presyo ng airline tickets, gayundin ang mass flight delays, kanselasyon, at diversions.

Hindi nagbigay ng tiyak na halaga ang mga kongresista hinggil sa itinaas ng pamasahe, subalit sinabi nilang marami silang natatanggap na reklamo mula sa mga pasahero na itinuturing umanong hindi makatarungan ang pagtaas ng singil.

Dagdag pa nila, labis umanong ikinadidismaya ng mga pasahero ang biglaang pagkansela ng mga biyahe kahit nasa paliparan na ang mga ito, gayundin ang madalas na pagkaantala ng paglipad nang walang malinaw na paliwanag mula sa mga airline.

Iginiit ng mga mambabatas na inaasahan ng batas ang “extraordinary diligence” mula sa mga kumpanyang sangkot sa air travel at hindi dapat ituring na normal ang mga abalang ito at ang kaakibat na pasaning pinansyal sa mga pasahero.

Bilang bahagi ng imbestigasyon, ipapatawag ng mga mambabatas ang Civil Aviation Authority of the Philippines (CAAP), Civil Aeronautics Board (CAB), at Department of Transportation (DOTr) upang alamin kung naipatutupad ang mga regulasyong nagpoprotekta sa karapatan ng mga pasahero.

Batay sa Passenger Rights law, obligadong magbigay ang mga airline companies ng kompensasyon sa mga pasaherong apektado ng flight delays at kanselasyon, kabilang ang hotel accommodation, libreng pagkain, at iba pang nararapat na tulong.

Ayon pa sa mga mambabatas, ang mga pasahero ang siyang nagdurusa sa pinsalang pinansyal, pagkaaksaya ng oras, at emosyonal na stress tuwing may delay o kanselasyon ng biyahe na hindi makatarungan para sa overseas Filipino workers, nakahihiya para sa lokal at dayuhang turista, at magastos para sa mga biyaherong may kaugnayan sa negosyo.

(BERNARD TAGUINOD)