NGAYONG araw, Hulyo 26, magbubukas ang hybrid session ng Senado upang ipagpatuloy ang tungkulin nitong maisabatas ang ilang prayoridad na panukala para sa 3rd Regular Session ng 18th Congress.

Sa pahayag, sinabi ni Senate President Vicente “Tito” Sotto III na nakatakdang talakayin sa pagbubukas ng sesyon ang 10 priority bills kabilang ang Amendments sa Foreign Investment Acts (FIA), Amendments sa Public Service Act (PSA), Government Financial Institutions Unified Initiatives to Distressed Enterprises for Economic Recovery (GUIDE), Department of Migrant Workers and Overseas Filipinos Act, Package 4 of the Comprehensive Tax Reform Program (CTRP) or the Passive Income Tax and Financial Intermediary Tax Act (PIFITA), Virology Science and Technology Institute of the Philippines (VIP), Rural Agricultural and Fisheries Development Financing System Act (Agri-Agra) and Package 3 of the CTRP or the Valuation Reform Bill.

Sinabi naman ni Majority Leader Juan Miguel Zubiri na nakatakdang talakayin ng Senado ang mga sumusunod na panukala: Modernization of the Bureau of Fire Protection, Increasing the Statutory Rape Age Act, Military and Uniformed Personnel Insurance Fund Act, Philippine Center for Disease Control and Prevention Act, the Bangsamoro Autonomous Region in Muslim Mindanao (BARMM) Extension Law at Bayanihan 3.

Katulad noong nakaraang taon, hindi pinayagan ang bisita o guests sa loob ng Senado dulot ng mahigpit na health protocols at regulasyon. Hindi rin pinayagan na makapasok maging ang kaanak ng senador, dating mambabatas, opisyal ng pamahalaan at media sa gallery hall tulad nang dati.

Tanging napiling empleyado ng Senado ang pinayagan sa session hall upang umalalay sa mga senador.

Bilang tradisyon, isang photo session ng mga senador ang iaayos para sa 14 mambabatas na pisikal na dadalo sa pagbubukas ng sesyon.

Susundan ito ng virtual press conference kay Sotto kabilang ang ilang senador na gustong dumalo sa briefing.

Pagkatapos ng sesyon sa umaga, pangungunahan ni Sotto ang ilang senador na magtutungo sa mababang kapulungan para sa joint session ng Kongreso upang dinggin ang huling State of the Nation Address ni Pangulong Duterte. (ESTONG REYES)