CAVITE – Nagsisisi ang isang lola na hindi man lamang siya lumingon dahil sumunod pala sa kanya ang 3-anyos niyang apo na nahagip ng rumaragasang motorsiklo habang siya ay tumatawid sa kalsada sa bayan ng Tanza sa lalawigang ito.

Hindi umabot nang buhay sa Manas General Hospital ang biktimang si “JR” ng Brgy. Halayhay, Tanza, Cavite.

Hawak na ng pulisya ang driver ng motorsiklo na si Marlu Centeno, 22, ng nasabi ring barangay.

Sa ulat ni P/MSgt. Richard Tumanguil ng Tanza Police Station, dakong alas-9:30 kamakalawa ng gabi ng mangyari ang insidente nang lumabas ang lola ng biktima para bumili sa tindahan sa kabilang kalsada sa Tramo Silangan, Brgy. Halayhay.

Ngunit lingid sa kaalaman ng matanda ay sumunod pala ang kanyang apo at nang tumawid ang biktima ay nahagip ng motorsiklo.

Isinugod ang bata sa ospital ngunit hindi umabot nang buhay.

Napag-alaman, ang biktima ay napunta sa pangangalaga ng kanyang lola  nang maghiwalay ang mga magulang nito. (SIGFRED ADSUARA)