IPINATUPAD na ng lokal na pamahalaang Lungsod Quezon ang iba’t ibang istratehiya kasama na ang citywide “search and destroy” operations para pigilan at makontrol ang dengue sa siyudad.

Ipinag-utos ni Mayor Joy Belmonte sa Quezon City Health Department (QCHD) na pangunahan nito ang nasabing operasyon kasama ng barangay officials at mga residente ng iba’t ibang barangay sa Lungsod Quezon.

Partikular na prayoridad sa nasabing programa ang mga barangay na may maraming bilang ng mga kaso ng dengue.

“Our goal is to ensure that our citywide anti-mosquito protective measures are implemented and enforced, while also educating all residents to encourage personal protection,” ani Belmonte.

Sa ilalim ng search and destroy strategy, ang buong komunidad ay magtatrabaho kasama ang pagtukoy at pagsira ng mga itlugan ng mga lamok na nagdadala ng dengue, tulad ng mga lata, bote, paso at gamit na mga gulong ng sasakyan.

Bukod  dito, hinikayat din ni QCHD Chief Dr. Esperanza Arias ang lahat ng mga residente na sumunod sa tatlong patakaran ng 4S: “Secure Self-Protection Measures like wearing long pants and long-sleeved shirts and daily use of mosquito repellent; Support fogging or spraying only in hotspot areas; and Seek early consultation”.

Sinabi pa ni Arias, ang mga residente na nakararanas ng lagnat ng dalawa hanggang pitong araw, plus dalawang kasunod na sintomas: tulad ng “headache, body weakness, joint and muscle pains, pain behind the eyes, loss of appetite, vomiting, diarrhea, and skin rashes” ay kailangan nang magpatingin sa pinakamalapit na health center para magpakonsulta.

“We made rapid dengue diagnostic kits available in all our health centers to ensure that all cases are screened and managed appropriately. Early detection and access to appropriate care reduces the likelihood of severe dengue or death,” ani Arias.

Ayon sa data mula sa City Epidemiology and Disease Surveillance Unit (QCESU), ang kabuuang kaso ng Dengue sa Quezon City ay nasa 1,098 na nai-report mula Enero 1 hanggang Hulyo 21, 2022.

Ito ay 573 cases o 109.14 percent na mas mataas kung ikukumpara sa parehong panahon noong nakaraang taon. (JOEL O. AMONGO)