Ni VT ROMANO
NAGPATALI si Portland Trail Blazers star Damian Lillard sa koponan hanggang 2026-27 season.
Hinugot ng Portland si Lillard bilang No.6 sa 2012 draft at naging All-Star member sa ikalawang taon niya. Pumirma siya ng four-year, $176.2 million deal noong 2019 at two-year, $121.7 million extension nitong July.
Naga-average si Lillard ng 24.6 points, 6.6 assists at 4.2 rebounds sa 711 career games.
Hindi pa nakalulusot ang Portland sa Western Conference Finals sapul nang maging centerpiece siya ng team.
Ang pagpapatali ni Lillard sa Portland ay ikinataas ng kilay ni two-time NBA champion J.R. Smith, huling naglaro sa Los Angeles Lakers. Kinuwestyon nito kung tama ba ang desisyon ng una na manatili sa team, sa halip na maghabol ng championship ring sa ibang koponan.
“Like, I love Dame. I love his game. I respect him for doing what he’s doing. But at the same time, it’s like, you just going to rot in Portland, bro? You are unbelievable,” ani Smith sa episode ng “No Chill with Gilbert Arenas” sa Fubo Sports Network.
Ayon naman kay Arenas, ang kawalan ng ring ni Lillard ay kukuwestyon sa kanyang legacy, bagama’t isa siya sa pinakamagaling na player sa NBA.
“The people you put in front of me are not even close to my stature, but because they got a ring, they get pushed in front of me,” lahad ng dating Washington Wizards star.
Ang Portland ay may isang championship sa franchise history – 1977 na pinangunahan nina Maurice Lucas at Bill Walton.
98
