NAHULOG sa kamay ng mga operatiba ng Manila Police District- Sampaloc Police Station ang isang lalaki na may kasong qualified theft through falsification of commercial document, sa bisa ng warrant of arrest sa Sampaloc, Manila noong Huwebes ng umaga.

“You can run but you can’t hide,” ito ang mariing ipinahayag ni Police Lieutenant Colonel Paul Jady Doles, commander ng Manila Police District – Sampaloc Police Station.

Nabatid na hindi na nakapalag ang suspek na si alyas “Itoh”, nasa hustong gulang, nang isilbi sa kanya ang warrant of arrest.

Ayon kay Doles, iniutos niya kay Police Captain Roger Reyes, hepe ng Station Warrant Section, ang pag-aresto sa suspek.

Sa isinagawang surveillance operation ay natunton ng mga awtoridad ang suspek sa isang lugar sa Sampaloc.

Ang naturang suspek ay top 3 most wanted person, station level, dahil sa kasong qualified theft through falsification of commercial documents. (RENE CRISOSTOMO)