INAASAHAN na lalong dadami ang bilang ng mga South Korean na mamamasyal sa Pilipinas sa nakatakdang pagbisita ng kanilang presidente sa bansa.

Ayon kay House committee on tourism vice chairman at Quezon City Rep. Marvin Rillo, makatutulong sa turismo ang pagbisita ni South Korean President Yoon Suk Yeol sa Pilipinas.

“South Korea has been the Philippines’ No. 1 supplier of foreign visitors for years, and we are counting on Mr. Yoon’s visit to encourage even more Koreans to spend their vacations here,” ani Rillo.

Sinabi ng mambabatas na mula Enero hanggang Hunyo ngayong taon, 673,841 South Koreans ang bumisita sa bansa.

Katumbas ito ng 25 percent sa 2,470,798 dayuhan na bumiyahe sa Pilipinas sa unang anim na buwan ng taong kasalukuyan.

Noong 2019, umaabot sa 1,989,322 South Koreans ang namasyal sa Pilipinas o katumbas 24 percent sa 8,188,477 foreign arrivals na naitala sa nasabing taon.

Kahit aniya noong kasagsagan ng travel restriction dahil sa COVID-19 pandemic ay 773,347 South Koreans pa rin ang namasyal sa Pilipinas mula 2020 hanggang 2022.

Taon-taon ay 29 million South Koreans ang lumalabas sa kanilang bansa base sa datos ng U.S. Department of Commerce’s International Trade Administration.

Noong Lunes, inanunsyo ni South Korean Ambassador-designate Lee Sang-Hwa, sa presentasyon ng kanyang credentials kay Pangulong Ferdinand R. Marcos Jr. sa Palasyo ng Malakanyang, na bibisita ang kanilang presidente.

“That’s exactly the point our President Yoon Suk Yeol mentioned to me at the credential ceremony in Seoul. He really, really looks forward to visiting this very country Philippines. But if not this year, I’m sure sometime in the first half of next year as we mark our 75th anniversary,” sinabi ni Lee kay Pangulong Marcos.

Samantala, kapwa nagkasundo ang Mexico at Pilipinas na itaas at paigtingin ang pagtutulungan pagdating sa kalakalan at kultura matapos ang coronavirus pandemic.

Ipinagdiwang ng dalawang bansa ang ika-70 taon ng relasyon ng mga ito.

Sinabi ni Ambassador-designate Daniel Hernandez Joseph ng Mexico na dahil may kasaysayan ang dalawang bansa na magkasama, mayroon aniyang cultural closeness na maibabahagi.

(BERNARD TAGUINOD/CHRISTIAN DALE)