HINDI isinusurender ng Pilipinas sa China kahit isang dangkal na teritoryo sa West Philippine Sea (WPS).

Ito ang nilinaw ni Department of Foreign Affairs (DFA) Secretary Teodoro Locsin Jr., sa pagharap nito sa House committee on appropriation para idepensa ang pondo ng ahensya sa 2022.

“We have not surrendered a single inch of territory. Not by word or deed have we weakened our right to everything in the West Philippine Sea,” ayon kay Locsin kahapon.

Malinaw aniya sa international community na ang WPS ay pag-aari ng Pilipinas at wala umanong bansa ang puwedeng umangkin o manakop sa nasabing territorial water.

Hindi lingid sa kaalaman ng lahat na inaangkin ng China ang buong South China Sea kabilang na ang WPS kung saan ilang reef ng Pilipinas ang kanilang tinayuan ng military facilities mula 1995.

Gayunpaman, pinatatag ng Permanent Court of Arbitration (PCA) ang karapatan ng Pilipinas sa WPS noong Hulyo 2016 na kinikilala umano ng international communities.

“We have pursued an independent foreign policy for the first time in the history of the Republic, and done well by earning a heightened respect from the community of nations. If we had been a tail, we have now wagging the dog,” ayon pa kay Locsin.

3-4M passport apektado

Samantala, inamin din ng DFA sa nasabing pagdinig na apektado sa pandemya sa COVID-19 ang passport renewal kaya umaabot sa 3 hanggang 4 million ang kanilang backlog.

“We admit your honor that there is a current backlog of around three million to four million for passport renewals. This stems from the pandemic which has limited our ability to provide the regular consular services and passport renewals to a lot of Filipinos,” ani DFA Undersecretary Brigido “Dodo” Dulay.

Kabilang sa mga dahilan kung bakit nagkakaroon ng backlog ay dahil bukas-sara aniya ang mga tanggapan ng gobyerno dahil sa lockdown at limitado ang tinatanggap nilang mga aplikante upang maiwasan ang paglaganap ng COVID-19.

Dahil dito, kailangan umano ng ahensya ng karagdagang 10 hanggang 20 temporary office passport service upang mapabilis ang proseso sa renewal at mabawasan ang backlog sa lalong madaling panahon. (BERNARD TAGUINOD)