February 18, 2021 - SAKSI NGAYON

Hindi patitinag sa resulta ng election protest MARCOS TULOY ANG LABAN SA 2022

February 18, 2021 jake

(NELSON S. BADILLA)

“SIGURADONG” lalahok si dating Senador Ferdinand “Bongbong” Marcos Jr. sa halalan sa pagkapangulo sa 2022.

Tiniyak ito ng kanyang abogado at tagapagsalita na si Atty. Vic Rodriguez na nagsabing si Marcos ay nagsimula nang “maghanda” nitong Enero para sa eleksyong pampangulohan.

Inihayag ni Rodriguez sa CNN Philippines na ang isipan ng kampo ni Marcos ay nakatutok tungo sa halalang 2022 simula pa nitong Enero 1.

Ikinasa na ‘yan bago pa man magpasya si Associate Justice Marvic Leonen na ilabas sa wakas ang kanyang ponente hinggil sa protestang elektoral ni Marcos laban kay Bise Presidente Maria Leonor Robredo at hilingin sa kapwa niya mga mahistrado na katigan ang kanyang desisyon laban kay Marcos.

Ang pangunahing paglalabanan sa pambansa at panglokal na mga halalan sa 2022 ay ang posisyon sa pagkapangulo ng bansa.

Sa kanyang mga panayam sa iba’t ibang media organizations, hindi binanggit ni Rodriguez na si Marcos ay tatakbo sa pinakamataas na posisyon sa pamahalaan.

Subalit, ang malinaw ay siguradong lalahok si Marcos sa pambansa at panglokal na mga eleksyon sa 2022, kahit ang Korte Suprema na tumatayong Presidential Electoral Tribunal (PET), ay itinapon ang dalawa sa tatlong aksyon/dahilan ng protestang elektoral ng dating senador.

Tinuran ni Rodriguez na ang pagbasura sa protesta ni Marcos ay “not relevant anymore” sa eleksyong presidensiyal.

Ngunit, hindi niya kategorikal na binanggit na sumusuko na si Marcos sa kanyang laban kay Robredo at sa laban niya para sa mamamayang Pilipino na solidong naniniwala sa kanya.

Malinaw na nakasaad sa desisyon ng PET na itinapon nito ang dalawa sa tatlong aksiyon ni Marcos sa buong protesta nito.

Ipinaliwanag ni Rodriguez sa panayam sa isang television program na “when we speak of election protest … in its strictest legal meaning it has .. acquire a legal meaning. Election protest pertains solely to manual recount and judicial revision… Surely, when you dismissed the entire election protest meaning the manual recount and judicial revision. It follows that you have to dismiss the counter protest”.

“[W]e have two pending causes of action before the tribunal. One is the manual recount and judicial revision which is strictly election protest and the other one, the annulment, our third cause of action. The annulment of election results in the three provinces of Mindanao,” pagpapalawig ni Rodriguez.

Idiniin ni Rodriguez na walang balak si Marcos na ibaba ang ikatlong ‘espada’ ng kanyang protestang elektoral dahil “it has been established during the numerous hearings and decisions and deliberations of the court the third cause of action is separate, distinct and can proceed independently from the manual recount and judicial revision”.

Noong Hunyo 2016 pa isinampa ni Marcos sa Korte Suprema ang pinaniniwalaan niyang krimeng ginawa ni Robredo noong halalang 2016 para sa pagkabise-presidente ng bansa.

Napakaliit lamang na boto ang inilamang ni Robredo kay Marcos, nangangahulugang ang beteranong politiko mula sa hilagang bahagi ng bansa ay mayroon pa ring napakalawak na tagahanga.

Ito ay kinumpirma ng unang sarbey sa mga kandidato sa pagkapangulo na isinagawa ng Pulse Asia noong Nobyembre na nagpakitang si Marcos ay ikalawa sa may pinakamataas na nakuhang iskor.

Pumangalawa siya kay Davao City Mayor Sara Duterte-Carpio.

Sa hiwalay na sarbey na ikinasa ng ibang kumpanya noong Disyembre ay ikalawa rin si Marcos sa mga nakakuha ng pinakamaraming boto.

Ang tanging pagkakaiba sa dalawang sarbey ay “very close” sina Marcos at Duterte-Carpio sa isa’t isa.

Nangangahulugan na ang approval rating ni Marcos bilang kandidato sa pagkapangulo ng bansa ay nakakuha ng karagdagang “percentage points” laban kay Carpio-Duterte.

Sina Marcos at Senadora Mary Grace Poe ay patas sa dalawang sarbey.

Inihayag ng kampo ni Poe na ang mambabatas ay hindi tatakbo sa pagkapangulo sa halalang 2022.

Ang ibang mga politiko na sumunod kina Marcos at Poe sa sarbey, ngunit napakalayo sa kanilang dalawa, ay pawang mga kaalyado at tagasuporta ni Pangulong Duterte.

Ang nag-iisang kabilang sa oposisyon ay si Robredo na ikaanim sa sarbey.

Tagapangulo ng Liberal Party (LP) si Robredo.

Matatandaang natalo ang siyam na kandidato ng LP sa pagkasenador noong halalang 2019.

Ipinaliwanag ni Rodriguez upang maging malinaw sa publiko na “regardless of the ultimate outcome of the decision [of the Supreme Court], regardless of the ultimate verdict of the tribunal, we will carry on at haharapin namin nang buong tapang ang kung anomang magiging hatol ng tribunal”.

“[T]he dismissal of the election protest, meaning the manual recount and judicial revision per se strictly, [are] no longer as impactful [compared to the years after Senator Marcos filed his electoral protest in 2016], siguro kung nilabas nila ito two years in to the life of the case. [M]aglilimang taon na tayo sa kasong ito, [ngunit] nasa tatlong pilot provinces pa lamang tayo…. [K]kahit naman sabihin nilang lets give due course to the election protest meaning the manual recount and judicial revision do they honestly believe na maniniwala pa kami na kaya namin pare-parehong tapusin ‘yong manual recount do’n sa natitirang halos 20 probinsya pa e meron na lamang tayong isang taon at apat na buwang natitira? So its no longer impactful it did not produce any mark of impression at all”.

Ipinaliwanag ni Rodriguez ang totoong nilalaman ng ikatlong aksiyon ng protestang elektoral ni Marcos upang huwag maguluhan ang publiko dahil pinalalabas ng ibang reporter na ang “annulment of election results” at “failure of election” sa tatlong lalawigan sa Mindanao ay iisa, samantalang magkaiba ang dalawang konseptong ito, alinsunod na rin sa paliwanag ng Commission on Elections (Comelec) sa mga posisyon at desisyon nito.

Ayon kay Rodriguez: “Iba ‘yung annulment of election results, hindi tayo (kampo ni Marcos) humihingi ng manual recount or revision do’n. I-set aside, declare null and void ‘yong naging resulta at magiging madali sana ‘yon…dahil meron nang mga naunang findings ang Comelec at ‘yong naging findings ng Comelec ay conclusive”.

“If I may refer to the case of Tan vs Hataman. Kaya lang naging moot and academic ‘yon dahil kumandidato sila pareho nu’ng 2019, but may initial findings na ro’n ang Comelec at conclusive ‘yong findings ng Comelec na ‘yon,” patuloy ni Rodriguez.

“Pangalawa, let me just correct ‘yung accuracy do’n sa reporting ni Mike Navallo [ng DZMM] hindi ho namin (kampo ni Marcos) third cause of action ang annulment of election results. Kahit silipin n’yo ‘yong aming pleading na fi-nile, e second.. originally second cause of action namin ‘yong annulment of election results. Pagkatapos po ng first ‘yong unconstitutionality of the automated election system na dinismis nang agaran ng Korte Suprema, pero nag-survive po ‘yong dalawa,” paglilinaw pa ni Rodriguez.

Aniya: “Ang aming original second cause of action is the annulment of the election results in the three provinces in Mindanao, pangatlo lamang ‘yong manual recount and judicial revision [na] bumaligtad na lamang no’ng naglabas sila ng preliminary conference order. Kaya, kami nagulat din.

Gusto naming malaman ano ‘yong inanunsyong botohan na 7-8, ano ‘yong botohang 8-7 because essentially, three votes ang binanggit ni Atty. [Brian Keith] Hosaka (tagapagsalita ng Korte Suprema) [na] 15-0, yung 7-8 and 8-7. Why are we interested? Because we want to find out ano ‘yong reasoning do’n sa 15-0, 7-8 and 8-7 because it might have a constitutional violation pagka-hindi maayos itong sinasabi n’yang 15-0, 7-8, 8-7”.

Binanggit ito ni Atty. Rodriguez dahil hindi naman kumpleto at detalyado ang paliwanag ni Hosaka sa mga importanteng bahagi at punto ng desisyon ng Korte Suprema sa kaso ni Marcos laban kay Robredo, dahilan upang hindi rin maging eksakto ang opinyon ng mamamayan.

PINAS NAPAG-IIWANAN SA FACE-TO-FACE CLASSES

February 18, 2021 jake

TANGING ang Pilipinas na lamang ang naiiwan sa mga bansa sa Southeast Asia na hindi pa bumabalik sa face-to-face classes.

Ayon kay Department of Education (DepEd) Secretary Leonor Briones, ito ang sinabi sa kanya ng UNICEF sa pakikipagpulong niya rito kamakailan.

Ayon sa Kalihim, ang face to face sa ibang bansa ay “contextualized” kung saan may iba aniya na may isang oras sa isang linggo habang ang iba naman ay dalawang araw. Depende aniya sa situwasyon.

‘Pero tayo na lang ang talagang.. hindi pa natin pinapayagan ang face-to-face dahil nga ang nangyari ay paglabas ng UK variant.. syempre nag-worry ang presidente na baka may epekto ito sa ating mga eskuwelahan,” ayon kay Sec. Briones.

Noong Disyembre 14 aniya ng nakaraang taon ay nagprisinta sila ng plano na kung mayroon aniyang mga agam-agam ay makabubuti na magsagawa na lamang muna ng pilot limited face-to-face schooling ang mga kabataan.

Sa buong mundo naman aniya kasi ay nakikita naman na karamihan sa mga bansa ay talagang nagbubukas na ng kanilang eskuwelahan. (CHRISTIAN DALE)

MGCQ sa Marso ikinakasa LOCALIZED LOCKDOWN IREREKOMENDA

February 18, 2021 jake

KUMBINSIDO ang National Economic Development Authority (NEDA) na ang paggamit ng localized lockdown ay mabuting pamamaraan para mapigilan ang pagkalat ng corona virus habang nakabukas ang ekonomiya ng bansa.

Ayon kay NEDA Chief Karl Chua, hindi naman nangangahulugan na kapag binuksan na ang ekonomiya ay babalewalain na at isasantabi ang pananatili ng pandemya.

“So hindi po naman natin sinasabi na ibukas lang natin ‘yong ekonomiya at huwag na nating pakialaman ‘yong covid cases kailangan po natin both. At nakita po natin na nagbukas po tayo last October at ‘yong dumaan po ‘yong Christmas vacation, hindi po naman umakyat ‘yong covid cases. In my concluding slide po, sa IATF meeting last Thursday, we presented the following recommendations, which was approved by the IATF and we hope for your approval also on the following,” anito.

Sa panukala aniyang isailalim sa modified general community quarantine (MGCQ) na ang bansa sa susunod na buwan ay base sa datos nuong nakalipas na Oktubre kung kailan nagre-opening ang mga negosyo at nitong nakaraang year-end holiday na hindi naman nakapagtala ng gayun kataas na kaso ng covid. (CHRISTIAN DALE)

Pag-aaral nais padaliin ni Rep. Nograles EASY ACCESS SA KABATAANG PWDs

February 18, 2021 jake

KAAKIBAT ng layuning matulungan sa kanilang pag-aaral ang mga batang kabilang sa persons with disabilities (PWDs), namahagi si Rizal 2nd District Congressman Fidel Nograles ng aabot sa 200 digital tablets kamakailan.

Personal na inabot ng mambabatas ang mga tablet sa mga estudyanteng PWD.

“Alam natin na napakaraming pagsubok ngayon na hinaharap ng mga batang may kapansanan sa kanilang online o distance learning,” ayon sa bagitong mambabatas.

“Kaya patuloy tayong nakaagapay sa ating mga PWD upang masigurado ang kanilang patuloy na pag-aaral,” dagdag pa nito.

Plano ni Nograles na palawigin at gawing institusyon na ang nasabing programa upang matulungan ang mga disabled student na malagpasan ang iba’t ibang pagsubok sa distance learning.

“Makikipagpulong po tayo sa mga special education stakeholders nang mas maintindihan natin kung paano mapupunan ang mga pagkukulang at maging mas makabuluhan ang suportang ibibigay natin sa kanila,” ayon pa Harvard trained-lawyer.

Ang mga ipinamahaging gadgets ng mambabatas sa mga PWD student ay paunang tulong pa lamang kaya naghahanap ito ng makakatuwang mula sa pribadong sektor at maging sa mga sektor ng akademya para maipagpatuloy ang pagtulong sa mga ito.

“We are envisioning putting in place a system that ensures easy access for children with disabilities and their families so that they are not left behind. This means establishing effective linkages, among others, so we can provide primary and supplementary learning resources at a subsidized rate, if not free,” ayon pa kay Nograles.

Si Nograles ay regular na tumutulong sa PWDs, senior citizens at iba pang bulnerableng sektor ng lipunan. (BERNARD TAGUINOD)

SINDIKATO NG FAKE COVID VAX TUGISIN

February 18, 2021 jake

HINILING ni Senador Nancy Binay sa Philippine National Police (PNP) na maglunsad ng malawakang pagtugis sa sindikato at grupong kriminal na gumagawa at nagbebenta ng pekeng bakuna sa halip na pagtuunan ang “perceived threats.”

Sa pahayag, umapela rin si Binay sa PNP na maging maingat sa kanilang oversight sa pangangalap ng mahahalagang impormasyon hinggil sa ilegal na pagbabakuna, clandestine vaccination clinics, manufacturing at pagbebenta ng pekeng COVID-19 vaccines.

“Instead of spending time questioning innocent individuals, pursuing false leads and chasing phantoms, bakit di na lang habulin yung mga sindikatong nagkakalat ng pekeng bakuna. With criminal groups taking advantage of the situation, our PNP should focus on real threats to public health, and not perceived threats,” ayon sa senador.

Idinagdag pa ni Binay na mas banta sa pampublikong seguridad at pampublikong kalusugan ang pekeng produkto na ibinebentang patago kaysa teacher-volunteers na kinukuwestiyon sa pagtulong sa mga mag-aaral sa mga liblib na lugar sa Mindanao.

Nitong Lunes, ipinost ni Pasig Mayor Vico Sotto sa kanyang Twitter ang screenshot ng isang seller na nag-aalok ng 50 vials ng pekeng Pfizer COVID-19 vaccines sa halagang P60,000.

“Merong failure of intelligence dito kasi noong October pa lumabas ang mga reports ng illegal vaccines na kumakalat sa merkado, pati na yung clandestine innoculation ng mahigit 100,000 Chinese POGO workers, pero patuloy pa rin yung pagbebenta ng mga pekeng bakuna at operation ng underground clinics,” ayon kay Binay. (ESTONG REYES)

NASUNUGANG PAMILYA SA TUMANA BINIGYAN NG CONSTRUCTION MATERIALS

February 18, 2021 jake

NABIYAYAAN ng mga gamit para makapagpatayo ng tirahan ang nasa 28 pamilyang nasunugan sa Barangay Tumana, Marikina City.

Pinangunahan ni Taguig Pateros Congressman Alan Peter Cayetano ang Powerful Group ng Kongreso na BTS o Balik sa Tamang Serbisyo sa pamamahagi ng semento, yero, hollow blocks at iba pang gamit sa pagpapatayo ng 20 semi-bungalow houses para sa mga biktima ng sunod kamakailan.

Kabilang sa umasiste kay Cong. Cayetano sina Anakalusugan Party-list Representative Mike Defensor, Bulacan Congressman Jonathan Alvarado at Laguna Cong. Dan Fernandez habang hindi naman nagpakita sa ginawang turnover ng materyales si Marikina Mayor Marcy Teodoro sa hindi malamang dahilan.

Kabilang sa 20 pamilya na nabigyan ng 24 metro kuwadradong konkretong pabahay sina Flordeliza Canales na 17 taon nang naninirahan sa lugar at may 5 anak; Mary Jane Aduque, may 7 anak at pitong taon nang naninirahan sa lugar at Caridad Fahinog, may 8 anak na walang naisalbang anomang kagamitan.

Kaugnay nito, labis na ikinagulat ng mga mamamahayag ang ginawang introduction ng mga opisyal ng Barangay Tumana sa pagdating ni Cayetano na tinukoy nitong House Speaker.

Ikinagulat din ng grupo nang malaman mula mismo sa mga residente na si Cayetano pa rin ang alam nilang pinuno ng mababang kapulungan ng Kongreso. (CESAR BARQUILLA)

Olympic gold medal posibleng masungkit ni EJ Obiena – PATAFA

February 18, 2021 jake

KUNG ang boksing ay mayroong Eumir Marcial na may pinakamataas na pagasa para mabigyan ang bansa ng Olympic medal sa darating na XXXIII Games sa Hulyo hanggang Agosto, pwedeng idagdag si pole vaulter Ernest John Obiena sa listahan ng mga posibleng makapaguwi ng inaasam na ginto mula sa Tokyo.

Katunayan, kung paniniwalaan si Philippine Athletics Track and Field Association (PATAFA) president Philip Ella Juico, hindi lamang basta Olympic medal ang kayang bitbitin ng 25-anyos na si Obiena sa pagbabalik niya sa Pilipinas mula Tokyo.

“Kahit ang halos 100 taon nating inaasam na kauna-unahang gintong medalya galing Olimpiyada, kayang madagit ni EJ,” deklara ni G. Juico sa nakaraang Philippine Sportswriters Association session.

“Our target for EJ is a podium finish, preferably gold,” sabi ni Doc Popoy sa online PSA forum noong Martes. “But we don’t want to put pressure on him, though.”

Ayon sa PATAFA top honcho, tamang daan ang tinatahak ni Obiena tungo sa kanyang target, base sa kanyang mga nakaraang kompetisyon na nilahukan sa Europa sa loob ng nakalipas na dalawang buwan.

Noong nakaraang linggo lamang ay sinira ni EJ ang kanyang pambansang rekord nang talunin ang 5.86 metro para mabingwit ang medalyang pilak sa Orlen Indoor Cup sa Poland.

Nauna rito, nakopo niya ang dalawang medalyang ginto sa kambal na kompetisyong sinalihan sa Berlin.

Nito lamang Huwebes (Manila time), nakamit ng anak nina dating national pole vaulter Emerson at hurdler Jeanette Obiene ang tansong medalya sa 2021 Copernicus Cup sa Torun, Poland.

Pang-apat na podium finish ito ni EJ ngayong taon lamang. At kung matutuloy ang listahan ng kompetisyong inihanda ng kanyang Ukranian coach na si Vitaly Petrov, hindi malayong makuha ng ating ipinagmamalaking pole vaulter ang Olympic gold medal sa Tokyo.

Medyo nahirapan si EJ sa Copernicus Cup na ilang beses nagtangka bago natalon ang 5.60 at 5.72 metro, ayon sa pagkakasunod.

May tsansa sana siyang maibulsa ang gold laban sa naghaharing two-time world champion na si Sam Kendricks at local boy Piotr Lisek, kung naabot ang 5.87 metro.

Nakuha ni Kendricks ang ginto matapos mapantayan ang 5.80 metrong marka sa isang pagtatangka, habang nakatatlong subok sina Obiena at Lisek.

Bukod kay EJ, nananalig din si Doc Popoy sa mga Fil-Am niyang alaga na sina sprinters Kristina Knott at Eric Cray, na magtatangka pa lang makarating sa Tokyo.

“For KK (Knot) and Cray, the target is to get to the finals (if they’ll make it to Tokyo) and from there anything can happen,” ani Juico.

Sa mga oras na ito, dalawa pa lamang atletang Pilipino ang may tiket na patungong Japan bukod kina Marcial at Obiena. Sila ay sina female boxer Irish Magno at gymnast Carlos Yulo.

Sa pinakabagong ulat, sina Marcial na kasalukuyang nasa Amerika, at Obiena ang lumalabas na may pinakamakislap na pagasa sa medalya.

Si Yulo, ang pandaigdig na kampeon sa floor exercise ay kasalukuyang nasa Tokyo at doon nag-eensayo.

Si Magno ay nitong Enero pa lamang nagsimulang maghanda matapos bigong mabigyan ng training venue ng Association of Boxing Alliances of the Philippines (ABAP) at ng Philippine Sports Commission (PSC) mula noong mag-qualify noong Marso, sa kasagsagan ng lockdown dulot ng COVID-19 pandemic.

OFW NA TAPOS NA KONTRATA AT MAY KARAMDAMAN AYAW PA RIN PAUWIIN

February 18, 2021 jake

DUMULOG sa AKOOFW ang ating kabayani na si OFW Cielo Sabando upang humingi ng tulong na siya ay masaklolohan.

Kasalukuyan na siya ay nasa Riyadh, Saudi Arabia at nakarating sa naturang bansa sa pamamagitan ng Hopewell Overseas Manpower Network, Inc.

Sa kanyang mensahe na ipinarating sa akin ay sinabi niya na siya raw humihingi ng tulong sa kadahilanan na ang kanyang operasyon sa bituka ay muli na namang sumasakit at wala raw siyang kakayahan na magtungo sa doctor para magpagamot.

Kasalukuyan na siya ay nasa loob mismo ng POLO Shelter ng halos apat na buwan na.

Isinusumbong niya na tila wala pang aksyon na ginagawa para sa kanya at maging ng gamot na kanyang hinihingi ay wala pa siyang natatanggap.

Mabilis ko itong ipinarating kay Welfare Officer Racquel Kunting na mabilis naman na tumugon at nangako na kanyang aalamin kung totoong nasa loob ito ng OWWA Shelter.

Siniguro niya sa AKOOFW na si OFW Sando ay agad na dadalhin sa ospital upang ipagamot. Aalamin din muli ang dahilan ng pagkabinbin ng kanyang pag-uwi sa Pilipinas.

Ang AKOOFW ay nanawagan din sa Hopewell Overseas Manpower Networks na kanilang suportahan at tulungan sa pangangailangang medical si OFW Sabando. Obligasyon pa rin kasi ng ahensya ang kanyang deployed na worker hangga’t hindi ito nakakarating o nakakauwi sa Pilipinas.

Samantala, nitong nakaraang Miyerkoles ay nakatanggap ako ng video call mula sa isang OFW na nasa Jeddah, Saudi Arabia na si Lashiel Balderas. Walang tigil ang kanyang pag-iyak at sobrang nakikiusap na siya ay matulungan na ma-rescue mula sa kanyang employer.

Inirereklamo niya ang laging “delayed” na sweldo at sobrang pahirap pa ang mga inuutos na ika nga ay ginagawang CCTV ang kanyang mata dahil sa bawat may nawawala o nakakaligtaan na anumang gamit ay siya ang agad na pinaghahanap at tila robot na kailangan orasan siya sa bawat inuutos sa kanya.

Si OFW Balderas ay nakarating sa Jeddah noong January 8, 2018 sa pamamagitan ng LBK Skill Providers Corp. Kung tutuusin ay tapos na niya ang kanyang kontrata ngunit sa kasalukuyan ay ayaw pa rin siyang payagan ng kanyang employer na makauwi sa Pilipinas.

Kaya’t labis-labis na ang kanyang paki-usap na siya ay matulungan. Nang matapos ang aking pakikipag-usap sa kanya ay agad kong tinawagan si OWWA Welfare Officer Yolanda Penaranda upang iparating sa kanya ang masidhing pakiusap ni OFW Balderas.

Agad naman itong tumugon at personal na mismo niyang tinawagan si OFW Balderas upang siguruhin sa kanya na ang kanyang sumbong at hinaing ay nakarating na sa kaalaman ng OWWA Jeddah.

Marami ang ganitong reklamo ng mga OFW na kung saan ang kanilang kontrata ay natapos na ngunit ang kanilang employer ay hindi pumapayag na sila ay pauwiin.

Lubhang tuso ang utak ng mga Arabo, dahil bagaman maituturing na sila ay mayamang bansa, ang kultura ng mga Arabo ay napakakuripot. Karamihan sa kanila ay talagang ayaw pauwiin sa Pilipinas ang kanilang kasambahay kahit labag na sa kalooban at sa batas, dahil lamang sa nanghihinayang sila na magbayad muli ng placement fee sa mga ahensya.

Tinatawagan ng pansin ng AKOOFW ang LBK Skill Providers Corp. na asikasuhin nila ang pagpapauwi kay OFW

Balderas at huwag todo-pasa ng kanilang obligasyon sa OWWA.

oOo

Kung mayroon kayong nais idulog o ipaabot sa inyong abang lingkod, maaari kayong sumulat sa akin sa e-mail address saksi.ngayon@gmail.com o drchieumandap@yahoo.com

ISAILALIM ANG BANSA SA MGCQ

February 18, 2021February 18, 2021 jake

PABOR ako sa kahilingan ng National Economic and Development Authority (NEDA) kay Pangulong Rodrigo Duterte na ilagay na ang buong bansa sa modified general community quarantine (MGCQ) simula sa Marso 1.

Ang katwiran ng NEDA ay kailangang paluwagin na ang umiiral na GCQ upang sumulong at makabawi ang ekonomiya.

Ganito rin ang posisyon ni Presidential Consultant for Entrepreneurship Joey Concepcion dahil kumbinsido siyang higit na mahihirapang makabangon ang ekonomiya ng bansa kung mananatili sa GCQ ang limitasyong ideneklara ni Duterte ilang buwan na ang nakalipas hanggang kasalukuyan.

Naniniwala ako kina NEDA Acting Secretary Karl Kendrick Chua at Concepcion.

Pabor na pabor ako sa posisyon nila.

Labis na napakalala ng kalagayan ng ekonomiya ng ating bansa.

Ang negatibong mahigit siyam na porsiyentong gross domestic product (GDP) nitong 2020 na siyang pinakamasahol mula noong 1946 ay walang ibang kahulugan, kundi bagsak na bagsak ang ating ekonomiya.

Limang milyon ang nawalan ng trabaho nitong 2020, ayon sa Department of Labor and Employment (DOLE).

Tapos, sabi pa ng DOLE na nitong Enero ay nadagdagan pa uli ito ng 133,315 na mga manggagawa kung saan mahigit 25,000 rito ay permanenteng wala nang trabaho.

Isama pa natin sa mga problemang ‘yan ay ang hindi matapus-tapos na sobrang taas ng presyo ng mga bilihin tulad ng baboy, manok, isda, gulay, bigas at marami pang iba.

Kung ganyan, walang dudang patuloy ring nababawasan ang kilo ng mga binibili ng mga manggagawa dahil nanatiling maliit pa rin ang kanilang sahod na nagsimula nang manalasa ang COVID-19.

At ang maliit na buwanang sahod na ito ay wala ring tigil na nababawasan ang halaga nito, o ang tinatawag na “purchasing power”.

Kumbinsidung-kumbinsido ako na magpapatuloy ito hanggang sa susunod na taon kapag walang gagawing mapagpasyang hakbang si Duterte upang harangin ang napakasamang nangyayari sa kalagayan ng mga manggagawa, sa partikular, at sa ekonomiya ng bansa, sa pangkalahatan.

Kahit iyabang ng mga senador at kongresista sa publiko na linagdaan na ni Duterte ang ipinasa nila ang ganito at ganoong panukalang batas upang “mabilis na makabangon” ang ekonomiya ay wala pa ring mangyayari sa buhay ng mga manggagawa at ekonomiya.

Ito’y dahil milyun-milyon ang walang trabaho sa kanila.

Ibig sabihin, milyun-milyon din ang walang pera sa kanila.

Kailangan nila ang trabaho upang tuluy-tuloy silang magkapera na regular nilang ipambibili ng mga

pangangailangan nila kada araw.

Kung bibigyan sila ng limang libong ayudang pera ng DOLE at ng Department of Social Welfare and Development (DSWD) ay siguradong hindi ito magkakasya sa buong isang buwan dahil – uulitin ko po – masyadong mahal ang presyo ng mga bilihin.

Kahit magbigay ang mga politiko at mga taong kabilang sa non-government organizations (NGOs) na nagbabalak tumakbo sa halalang 2022 ng dalawang kilong may amoy na bigas, noodles at sardinas ay hindi pa rin aayos ang buhay nila dahil nanatili ang sagka sa kanilang pagkilos.

Ang sagkang ito ay ang pananatili ng GCQ.

Sa ilalim ng GCQ, nasisita at nakakasuhan pa ang mamamayang hindi sinusunod ang mga alintuntunin hinggil sa pag-iwas sa COVID-19.

Ngunit, kung ang mga katulad nina Senador Emmanuel Pacquiao, Presidential Spokesperson Harry Roque Jr., at iba pang opisyal ng pamahalaan ay absuweto.

Kaya, hindi makakilos nang maayos ang ordinaryong mamamayan dahil ang totoong nagaganap ay sa kanila lang nakabantay ang batas.

Silang mga maralita ang pinaparusahan, samantalang ang mga senador at opisyal ng pamahalaan na mistulang nangangampanya na habang nagsasalita sa harapan ng napakaraming tao ay walang linabag na batas at anomang alituntunin hinggil sa pag-iwas sa COVID-19.

Pokaragat na ‘yan!

Kaya, upang makakilos ang ordinaryong mamamayan para makapaghanap-buhay nang hindi nagdadalawang – isip na mayroong silang linabag na batas at alituntunin ay ilagay na sa MGCQ ang buong bansa.

At upang magkaroon sila ng hanap-buhay, buksan na ang malaking porsiyento ng mga negosyong pasok sa kategoryang Micro, Small, Medium Enterprises (MSMEs).

Sabi nina Concepcion at Sergio Ortiz – Luis ng Employers Confederation of the Philippines (ECOP), mayorya ng MSMEs ay sarado dahil sa limitasyong itinakda ng ‘pagsasara’ ng ekonomiya mula noong enhanced community quarantine (ECQ) pa hanggang GCQ.

Sabi pa nga ni Luis, malabong pagbigyan ng mga negosyanteng MSMEs ang kategorya ng kanilang mga negosyo ang kahilingan ng mga manggagawa na dagdagan ang kanilang sahod dahil sarado ang karamihan sa kanila at ang mga bukas ay lugi raw.

Ang punto nina Luis at Concepcion, ilagay na sa MGCQ ang buong bansa upang umusad at makabangon ang mga negosyante upang magkaroon ng trabaho ang mga manggagawang nawalan ng trabaho – at isusunod ang umento sa kanilang suweldo.

Maganda ‘yang punto nila.

Lalo pa kung totoo ang malasakit nila sa mga manggagawa, maliban sa ‘kalunus-lunos’ na kalagayan ng mga kapitalista.

Totong mahirap at napakadelikado dahil hindi mapagpasyang nalulutas ng bansa ang COVID-19 at pumapasok na ang United Kingdom Variant na COVID-19 sa bansa na sinasabing higit na masahol kaysa naunang COVID-19.

Ngunit, kung tuluyang dadausdos ang ekonomiya, kung magpapatuloy na libu-libong mamamayan ang mawawalan ng trabaho kada buwan at sisirit pang muli pataas ang presyo ng mga bilihin ay pihadong higit na napakahirap ng ating buhay sa mga susunod na buwan at taon, lalo na iyong sobra-sobrang napakahirap ng buhay.