DELIKADO ANG POLIOVIRUS

SA TOTOO LANG

Nakalulungkot ang balita ngayon.

Matapos ang 19 taong pagdedeklara na wala nang polio sa Pilipinas, heto tayo muli at tinamaan ng mapaminsalang sakit na ito.

Ito ang kinumpirma ng Department of Health kung saan nabalitaan at napatunayan ding mayroon polio case sa Lanao del Sur.

Nakalulungkot din na malaman na sadyang marumi ang ating kapaligiran. Ito ay dahil na rin ang poliovirus ay na-detect sa water sewerage samples sa Manila at Davao.

Dengue ang halos hindi pa tapos na kinakaharap ng ating pamahalaan at mamamayan. At marami ang namatay sa sakit na iyan. Maraming pamilya ang higit na naapektuhan. At ito ang itinuturing ngayong “Worst dengue outbreak in years”. Hamakin ninyong sumampa ng 271,480 kaso ang naitala mula Enero hanggang Agosto 31 ng taong kasalukuyan. Sumampa rin sa 1,107 ang bilang ng mga namatay at ang mga ito ay mga bata.

Sa kaso ngayon ng polio, huwag naman sanang umabot pa o gumalaw ang bilang ng mga pasyente nito. Hindi naman makatarungang abut-abot na ang mga sakit na dumadapo sa bansa.

Ang mga sakit na iyan ay nagmula rin naman sa kapabayaan at pagiging marumi sa ating kapaligiran.

Isang hakbang na dapat na tumalima o sumunod ang publiko ay ang isinasakatuparan ngayon nang sabay-sabay na pagpapabakuna laban sa poliovirus. Dahil mga batang may edad lima pababa ang kalimitang tinatamaan ng sakit na ito, ang dapat na unang kumilos ay ang mga magulang.

Kailangang madala ang mga bata sa pinakamalapit na health center o bago nito ay alamin ang mga hakbang na dapat gawin para maiwasan ang naturang sakit.

Mahalaga ang pagbabakuna at mahalagang makumpleto ng mga bata ang bakuna para manatiling ligtas ang mga ito sa vaccine-preventable diseases, gaya ng polio. Dapat nating alalahanin na walang gamot ang polio kaya makipag-ugnayan tayo sa pamahalaan para sa ligtas na bansa.

Huwag nating balewalain ang mga sakit na akala natin ay kaya nating panghawakan o makontrol. Ang poliovirus ay kayang makaparalisa ng pasyente. (Sa Totoo Lang / ANN ESTERNON)

Please follow and like us:
Read More

KASO NG RAPE, MALALA

SA TOTOO LANG

Masakit mang tanggapin, ang kaso ng pang-aabuso sa mga kababaihan ay tila pangkaraniwan na lamang. Nangyayari ito sa iba’t ibang bansa sa mundo. Gayunman, iisa ang mga negatibong epekto nito sa mga biktima, ganoon din sa kanilang mga pamilya.

Sa Pilipinas, terible rin ang kaso nito kung saan napakaraming biktima ay patuloy pa ring nagdurusa sa kawalan ng hustisya sa mahabang panahon. Ang masakit para sa kanila ay normal ang buhay at normal na nakalalaya ang mga may sala.

Noong 2016, napaulat na may 4,605 na mga kaso hinggil sa violence against women. Kabilang dito ang rape, acts of lasciviousness, attempted at incestuous rape.

Sa incestuous rape na lang, wala tayong malinaw na record sa Pilipinas kung ilang kaso mayroon tayo niyan. Nangyayari sa loob ng pamilya ngunit walang nagsusumbong dahil sa ito’y maselang bagay. Walang nagsusumbong kaya’t ang epekto ng rape ay lalong mas masakit para sa mga biktima.

Nangyayari ang panggagahasa dahil may rapist at hindi dahil sa kung anoman ang tungkol sa nabiktima.

May taong sadyang marumi ang utak at basura ang pagkatao kaya’t may mga kaso ng rape.

Ang rape ay isang heinous crime. Winawasak nito ang pagkatao, personalidad, buhay at pag-asa ng mga biktima. Kaya ang gawing biro ang rape ay mabigat na kasalanan at hindi dapat pamarisan o bigyang pagtangkilik.

Ang rape ay isang malagim na suliranin ng anumang lipunan ng kahit anong bansa.

Ang totoo, kahit magnumbalik ang batas sa parusang bitay, hindi nito mahihinto ang kasamaan ng rapist. Masakit ding isipin na para bang may rape culture kahit saang lugar.

Sa pamilya, mahalagang ituro o magkaroon ng usapin sa sex sa tamang paraan na maiintindihan ng mga anak lalo na ang mga lalaki kung ano halimbawa ang sexual consent – ano ang ibig sabihin nito, paano ito nangyayari, paano nakukuha ang consent, anong gagawin at mangyayari kapag ang potential sexual partner ay hindi ibinigay ang consent na ito. Isa ito sa mga paraan para malabanan ang rape culture sa lipunan.  (Sa Totoo Lang / ANN ESTERNON)

Please follow and like us:
Read More

NAKALIPAD NA, PAANO NA IYAN?

SA TOTOO LANG

Masama at masakit na balita.

Inihayag kahapon ni Department of Interior and Local Government Secretary Eduardo Año na nakarating sa kanila ang balita na ilan sa mga napalayang mga bilanggo dahil sa Good Conduct Time Allowance ay wala na sa Pilipinas. Ito ay mga nakalipad na sa ibang bansa at tuluyan nang nagpakalaya-laya.

Paano na iyan? Sana bumalik sila o mapabalik ng ating pamahalaan at harapin ang kanilang isyu sa bansa. At kung hindi sila makababalik, parang pinalaya na lamang basta ang karapatan at hustisya sa mga biktima ng krimen.

Napakasakit na balita ito lalo na sa mga naging biktima ng mga nagkasala sa kanila. Kasingsakit din ito na dinadala ng mga pamilya ng mga biktima.

Ayon sa Bureau of Corrections nasa 22,049 persons deprived of liberty ang nakalaya na mula 2014 hanggang sa taong ito. Ang paglaya nila ay batay sa GCTA. At sa naturang bilang 1,914 ay nakulong dahil sa karumal-dumal na mga krimen. Ang mga krimen na ito ay tulad ng pagpatay at panggagahasa, bagay na ikinagalit ng publiko na ganito pala ang naging kaso pero maluwag na nabigyan ng karapatang makalaya.

Sa naturang pahayag ni Año mayroong pag-asa na mapabalik ang mga napalaya dahil sa GCTA. Sana.

Ang Philippine National Police ay nakikipag-ugna­yan ngayon sa Interpol o International Criminal Police Organization para mapabalik ang mga napalayang bilanggo sa pamamagitan ng extradition.

Tumugon naman umano ang Interpol sa naturang isyu.

Noong Miyerkoles lang ay nagbigay ng ultimatum si Pangulong Rodrigo Duterte hinggil sa mga bilanggo na napalaya dahil sa GCTA. Binigyan sila ng 15 araw para muling humarap sa awtoridad para kaharapin muli ang kaso nila. Kung hindi sila susuko ay ituturing silang mga pugante ng batas.

Sa pinakahuling balita ay halos 80 napalayang bilanggo pa lamang ang mga sumuko, una na rito ang napabalitang 86-anyos na lalaki na inihatid o sinamahan ng kanyang pamilya para harapin ang isyu sa pamahalaan. (Sa Totoo Lang / ANN ESTERNON)

Please follow and like us:
Read More

GULO SA PAGPAPATUPAD NG BATAS

SA TOTOO LANG

Sa nangyaring kapalpakan sa Bureau of Corrections malaking gulo ang iminarka nito sa mga opisyal at ng mismong pamahalaan.

Malaking stigma ito sa sistema ng ating batas na para bang mismong ang nagpapatupad sana ng tuwid na batas ay hindi makaintindi sa nilalaman mismo ng batas. O baka naiintindihan naman nila pero dahil sa mga pansariling interes e hindi bale na lang na baluktutin ang tama at ipagpatuloy ang kanilang mga pansariling kagustuhan para sila lamang ang mga makinabang.

Nagpalaya ang BuCor ng mga presong nahatulan dahil sa karumal-dumal na krimen. Kung hindi pa sa public outcry malamang nakalaya na rin ang rape-slay convict na si dating Calauan, Laguna Mayor Antonio Sanchez. At dahil din diyan ay naglabasan ang mga tinatagong kontrobersya sa sistema ng pagpapatupad ng Good Conduct Time Allowance (GCTA) para basehan sa pagpapalaya sa mga preso.

Sa mga pinalayang halos 2,000 preso, pinababalik sila ngayon at may ultimatum na 15 araw o dalawang linggo para sumuko sa awtoridad.

Mabigat na laban, hamon at kahihiyan iyan sa panig ng pamahalaan, sa imahe ng bansa, at siyempre pa sa mga pamilya ng mga presong akala nila ay natamo na nila ang kalayaan.

Pero higit na masakit ang bagay na ito para sa mga pamilya ng naging biktima ng mga presong sangkot sa krimen. At totoong matagal ang 15 araw na palugit para sumuko at maharap muli ang kanilang kaso.

Kapag hindi sumuko ang mga nakalayang preso ay ituturing sila ng batas na fugitive o mga pugante. Maka­klasipika sila na “evading their sentence” kapag nadeklarang pugante matapos ang 15-day period.

Kaya, ayon sa batas ay continuing offense ito hanggang hindi sinusuko ng mga pinalayang mga preso ang kanilang mga sarili. At ground na ito na maaaresto sila o mahahainan ng warrantless arrest kapag ganito.

Pero may laban din ang preso ritong napalaya na, ayon sa ilang mga abogado. Ito raw ay dahil ang paglaya na natamo nila ay vested rights nila. Kaya mas magulo, masakit sa ulo.

Sadyang iba ang batas sa atin dahil namamanipula. Nakakahiya. (Sa Totoo Lang / ANN ESTERNON)

Please follow and like us:
Read More

HINDI DAPAT MAKALAYA

SA TOTOO LANG

Nakalulungkot kung mapalalaya si dating Calauan, Laguna mayor Antonio Sanchez para sa good conduct time allowance (GCTA) na nasa batas.

Iyan ang mainit na balita ngayon na humatak muli sa publiko na magbalik tanaw sa krimeng ginawa ng nasabing alkalde. Marami ang tutol dito at naroon ang simpatiya sa mga naulila ng mga naging biktima ng alkalde.

Nakulong si Sanchez noong 1995 nang mahatulan ng seven terms ng reclusion perpetua.

Ang krimen ay naganap noong 1993 kung saan dinukot ang UP Los Baños students na sina Eileen Sarmenta na 21-anyos noon at Allan Gomez, 19.

Si Sarmenta ay ginahasa ni Sanchez habang binugbog naman si Gomez ng kanyang mga tauhan.

Nang matapos si Sanchez kay Sarmenta ay ibinigay ito sa kanyang mga tauhan para muling magahasa saka pinatay nang karumal-dumal ang dalawang estudyante.

Naging guilty si Sanchez sa kasong ito, kasama ng 6 na iba pa.

26 taon na ang nakalipas at walang makalimot sa bangungot na ginawa ng dating alkalde.

Dahil sa balitang makalalaya na ang may sala, sinong hindi magagalit?

Ngunit may paglilinaw sa isyu si Secretary of Justice Menardo Guevarra sa reclusion perpetua at sinabi nitong “Ang mga tao, intindi nila sa habambuhay na pagkabilanggo, literal. Ang maximum lang na pwede i-serve ng preso ay 40 years.”

May paliwanag din ang GCTA ay hindi tumutukoy sa simpleng arithmetics, dapat aniyang may good conduct na ipinapakita, walang bina-violate na rules sa loob ng bilangguan. Saka pa lamang dito papasok ang GCTA computation, kapag nasuring ang preso ay kwalipikado.

Hindi pa nae-evaluate si dating mayor Sanchez hinggil sa GCTA kaya naroon ang sinasabing huwag i-assume ng publiko na makalalaya siya. Totoo naman kaya?

Ayon naman kay Bureau of Corrections  director-general Nicanor Faeldon may violations na nagawa si Sanchez habang nasa loob.

Noong 2006, may pagtatago siya ng ilegal na droga kasama ang drug paraphernalia na bagama’t na-dismiss ay record pa rin iyon. Noong 2010 nadiskubre sa kanyang selda ang P1.5 milyong shabu sa ilalim ng estatwa ng Virgin Mary.

Kapag nakalaya ang mamang iyan, anong assurance natin na hindi siya gagawa muli ng krimen? (Sa Totoo Lang /ANN ESTERNON)

Please follow and like us:
Read More

SENTIDO KUMON NAMAN!

SA TOTOO LANG

Viral ngayon sa social media ang video kung saan isang foreign national ang sinasabing nag-assist sa kasama nitong bata na hinihinalang anak nito habang dumudumi (pooping) sa baybayin ng Boracay Island.

Matapos na dumumi ang bata ay ang tanging ginawa lamang ng sinasabing ina nito ay tinakpan lamang ng buhangin ang naturang dumi sa Station 1.

Dahil kinunan ang insidente ay kumalat ito sa social media at humakot ng mga komento.

Nasa Municipal Ordinance Number 311 o Anti-Littering Law sa bayan ng Malay sa Aklan ang anumang uri ng pagdudumi, pagdudura, pag-iihi sa mga pampublikong mga lugar gaya ng Boracay.

Pero Dios mio naman! Sentido kumon, kailangan pa bang malaman ng mga banyaga na bawal ang ganoong uri ng mga aktibidad. Wala yata sa kanila ang salitang konsiderasyon at respeto sa kapwa.

Kung talagang walang kaalam-alam sila rito ay dapat may kusang-palo sila na alamin ang mga bawal sa lugar lalo’t hindi sila tagarito.

Nakarating na sa Department of Interior and Local Government ang video ng insidente at ayon sa panayam sa kanila ng isang news agency ang mananagot dito ay ang nanay ng bata. Dapat naman para hindi sila pamarisan ng kung sinu-sino – local o foreign nationals man sila.

Hindi yata nalalaman ng banyagang babaeng ito na sumailalim sa anim na buwan na malawakang clean-drive ang Boracay noong nakaraang taon.

Parang hindi naman tama na matapos nating linisan nang mahabang panahon ang prestihiyosong lugar ay may kung sino lang na dudumi at sisira sa ganda nito. (Sa Totoo Lang / ANN ESTERNON)

Please follow and like us:
Read More

DENGUE AT ANG SUPLAY NG DUGO

SA TOTOO LANG

Umangat na naman ang Pilipinas sa “pinaka”.

Pero ang bagong balita ay nakalulungkot at nakaaa­larma dahil ang Pilipinas ngayon ang may pinakama­raming kaso ng dengue sa Southeast Asia sa taong ito.

Ang bilang kasi ng kaso ng dengue sa ngayon ay sumampa na sa 146,062 at nakapagtala na rin tayo ng mga pasyenteng namatay rito sa bilang na 622.

Ang nakalulungkot pa rito, may area o sangay ng Philippine Red Cross (PRC) na namumroblema ngayon sa suplay ng dugo para maitulong sana para sa blood transfusion ng mga pasyente na na-dengue.

Ang dengue ay isang mosquito-borne disease na hindi basta-basta. Uubusin nito ang lakas ng iyong katawan at pera mula sa iyong bulsa.

Noong nakaraang buwan lamang ay nagpahayag ang PRC-Capiz chapter sa Roxas City na paubos na ang platelet concentrate blood sa kanilang tanggapan na siyang ginagamit sa dengue patients.

Kamakailan lang din ay binabantayan ng PRC sa Zamboanga City ang suplay ng dugo sa kanilang bloodbank.

Sa paglobo ng dengue cases naroon na may isyu rin at magiging isyu rin ang kakulangan sa suplay ng dugo.

Hindi naman kasi basta-basta na lamang ang pagkuha ng dugo sa tao. Maraming mga bagay na dapat ikonsidera gaya ng tipo ng dugo, ang kalinisan nito, ang sitwasyong pangkalusugan ng kukuhanan ng dugo at kung anu-ano pa.

Malaking problema ang dulot kung sa ganyang bagay ay mayroong kakulangan. Ito ay dahil nakasalalay dito ang buhay ng mga pasyente na nangangailangan ng dugo, lalo na ang nagkakasakit ng dengue na kailangang sumailalim sa blood transfusion.

Kung sino man sa atin ang nais mag-donate ng dugo magtungo lang sa tanggapan ng PRC. Kailangan iyan ng bawat isa sa atin…kahit hindi man sa kaso ngayon ng dengue. Pero naroong nakapokus ang ahensya ng pamahalaan para resolbahin ang dengue na epidemic na ngayon. Kailangan lang diyan ay magtulungan. (Sa Totoo Lang / ANN ESTERNON)

Please follow and like us:
Read More

KOOPERASYON NG BAWAT ISA KONTRA DENGUE

SA TOTOO LANG

Kahapon ng hapon ay nagdeklara na ang Department of Health (DOH) na tayo ay humaharap sa national dengue epidemic dahil sa tumataas na bilang ng mga tinatamaan ng sakit na ito.

Nakaaalarma naman talaga dahil lumalala ang kaso ng dengue sa bansa dahil sa mapaminsalang mga lamok.

Hindi biro ang rekord na nakapagtala na tayo ng 622 patay at 146,062 ang bilang ng kaso nito mula Enero hanggang Hunyo ng taong kasalukuyan. Ito ay mas mataas na 98 por¬syento sa naitalang kaso sa parehas na panahon noong nakaraang taon.

Noong nakaraang taon kasi ay nagtala lamang tayo ng 73,818 kaso ng dengue.

Sa puntong ito hindi dapat magpatumpik-tumpik ang ating pamahalaan.

Ang dengue ay isang mosquito-borne viral infection na nagiging sanhi ng pagkakaroon ng flu-like illness at maaari ring pagsuspetsahan kapag ang mataas na lagnat ay may kasamang dalawa sa mga sumusunod: matinding pananakit ng ulo, pananakit ng likod ng mga mata, matin¬ding pananakit ng kalamnan at kasu-kasuan, pagduduwal o pagsusuka, at pagkakaroon ng pamamantal (rashes).

May napabalita ring makatutulong sa isyung ito sa paglabas ng food supplement na may sangkap ng halamang tawa-tawa.

Ang tawa-tawa (o gatas gatas kung tawagin ng iba) ay madalas na ginagamit sa mga lalawigan at ito ay pinakukuluan at iniinom.

Ang tawa-tawa ay mabisang tulong para mapahusay ang cell production at maprotektahan ang platelets mula sa pagkasira nito. Ang halaman na ito ay mabisa rin para mapataas ang blood platelets lalo na sa may sakit na dengue.

Ngunit bago ilabas sa merkado ang food supplement na ito ay kailangang dumaan muna ito sa clinical tests/trial. Sana ay agaran din ang pag-aaral sa food supplement para makatulong sa kaso ng dengue at tuluyang mabawasan kung hindi mawala ang sakit na ito sa bansa.

Mahalaga na mag-anunsyo ng national epidemic para malaman kung anong localized response ang kinakailangan. Dito rin malalaman na dapat ay may pagkilos na sa local government units at maglabas na rin ng kaukulang pondo para matugunan ang isyung pangkalusugan. Kawawa ang pasyenteng umaasa sa tulong lamang ng gobyerno dahil sila ang mga walang-wala.

Kailangang mag-double time sa pagkilos ang lahat – hindi lamang ang DOH. Dapat ay may pakikiisa ang mamamayan para rito. (Sa Totoo Lang / ANN ESTERNON)

Please follow and like us:
Read More

PAGBANGON KAILANGAN NG ITBAYAT, BATANES

SA TOTOO LANG

Noong isang araw lamang ay may ulat na aabot sa P282 milyon ang halaga ng mga napinsalang gusali sa Itbayat, Batanes dahil sa magkakasunod na mga lindol na nangyari rito noong nakaraang Sabado. Iniulat din na nasa 185 mga bahay ang tuluyang gumuho at hindi na magagamit pa dahil sa trahedya.

Sa pinakabagong ulat kahapon ay inihayag ni Batanes Province Governor Marilou Cayco na kailangan ng kanilang lalawigan ang P886 milyon para sa rehabilitasyon.

Malaking pondo ang kailangan na iyan at hindi kakayanin ng lokal na pamahalaan na muling maibalik sa dating ayos ang kanilang bayan dahil sa matinding lindol na kanilang sinapit.

Kahit hindi humingi ng tulong ang kanilang pinuno ay obvious na kailangan nila ng ayuda mula sa national government, sa mga pribadong sektor o sa mga taong may pusong natural na tutulong sa ganitong pagkakataon.

Hindi biro ang casualties na naitala sa lalawigan na ito.

Ayon sa National Disaster Risk Reduction and Ma­nagement Council, may kabuuang siyam ang mga namatay, 64 ang mga sugatan. May kabuuan ding 1,025 pamilya o 2,963 katao ang mga apektado ng trahedya. Sa mga ito 742 pamilya o 2,365 katao ang nananatiling nasa public market o nasa Municipal Plaza sa Brgy. San Rafael, Itbayat, Batanes dahil sadyang walang mga matuluyan dahil ang kanilang bahay ay gumuho nang lahat.

Sa ganitong sitwasyon ay maging matik sana ang pagtulong natin sa ating mga kababayan lalo na sa mga walang natira ultimo ang kanilang mga bahay na dugo’t pawis din ang naging puhunan.

May takot ding patuloy pang nararamdaman ng mga tao rito dahil hanggang kahapon ay nakararanas sila ng paglindol kaya’t wala pa ring katiyakan ang kanilang kaligtasan.

May mga pagdaing na rin ang mga magulang lalo sa mga may anak na masyado pang bata ngunit magkakasama silang lahat sa iisang lugar kung saan mas prone rin sa mga sakit at kung anu-ano pa.

Malaking tulong ang kailangan ng Itbayat, Batanes para sa kanilang pagbangon, huwag naman natin silang pabayaan o kalimutan. (Sa Totoo Lang / ANN ESTERNON)

Please follow and like us:
Read More