NAMAHAGI ang pamahalaang lungsod ng Navotas ng mga smart phone na magagamit ng 3,057 estudyante ng public elementary at high school para sa school year 2020-2021.

Ang beneficiaries ay kabilang sa mga idineklara noong enrolment na walang sariling mga gadget na kanilang magagamit sa online classes.

“We set aside P4.5 million from our Special Education Fund and realigned P9.8 million of our budget for the programs of the Navotas City Council for the Protection of Children. This enabled us to purchase 2,682 smart phones for our students,” ani Mayor Toby Tiangco.

Samantala, nagbigay naman si Cong. John Rey Tiangco ng 350 cellphones para sa Tutor Learning Child (TLC) at Support Our Students (SOS) programs.

Ang TLC ay pinagsamang proyekto ni Cong. Tiangco at Department of Education-Navotas na inilaan upang tulungan ang mga mag-aaral ng K-12 na walang sinumang nagtuturo para gabayan sila sa modular lessons o walang gadget para sa pag-aaral sa kanilang bahay.

Habang ang SOS naman ay donation drive na suporta sa pangangailangan ng K-12 students, kabilang ang smart phones, tablets, internet load, school supplies at iba pa.

Bukod sa smart phones mula sa pamahalaang lungsod at kay Cong. Tiangco, tumanggap din ang DepEd-Navotas ng 25 unit-donation mula sa isang private organization.

“Navotas has a meager budget compared with other cities in Metro Manila, but we do what we can to provide for the needs of our students and support their schooling,” sabi ni Mayor Tiangco.

Nauna rito, nagtatag si Mayor Tiangco ng online games sa kanyang social media fan page para mabigyan ang mga Navoteñong estudyante ng oportunidad na manalo ng gadget.

Umabot sa 81 estudyante mula sa elementary hanggang college ang nakatanggap ng smart phones para sa kanilang online classes. (FRANCIS SORIANO)