CAVITE – Himas-rehas ang tatlong hinihnalang tulak ng ilegal na droga, kabilang ang isang babae, makaraang nahulihan ng tinatayang P272,000 halaga ng umano’y shabu, baril at bala sa isinagawang buy-bust operation sa Dasmariñas City noong Huwebes ng gabi.

Nahaharap sa kasong paglabag sa RA 9165 o Comprehensive Drugs Act of 2002 at RA 10591 o Comprehensive Firearms and Ammunition Regulation Act ang mga suspek na sina alyas “Alex”, “Roilan” at “Princess”.

Ayon sa ulat, bandang alas-10:05 ng gabi, nagsagawa ng buy-bust operation ang mga operatiba ng Intel/City Drug Enforcement Team ng Dasmariñas Component City Police sa Brgy. Langkaan 1, Dasmariñas City na nagresulta sa pagkakaaresto sa mga suspek.

Nakumpiska sa mga ito ang tinatayang 40 gramo ng hinihinalang shabu na may standarad drug price na P272,000.

Bukod sa ilegal na droga, nakumpiska rin mula kay Alex ang isang kalibre .45 Norinco pistol, isang kalibre .45 magazine, tatlong bala ng kalibre .45, at buy-bust money na ginamit sa operasyon.

Ang tatlo ay nasa kustodiya na ng Bacoor Component CPS. (SIGFRED ADSUARA)