PINAGTIBAY ni Brian Poe Llamanzares, unang nominado ng FPJ Panday Bayanihan Party-list ang kanyang pangako na isulong ang mga karapatan ng hayop habang patuloy na tumataas ang pagmamay-ari at pag-aampon nito sa bansa.

Sinabi ni Poe na ang party-list ay makatutulong sa iba pang stakeholders na masubaybayan ang patuloy na pagmamalupit sa mga hayop sa kanayunan, kabilang ang pagkatay at pagbebenta ng karne ng aso, partikular sa mga lalawigang bulubundukin.

Nabatid na ilang ritwal pa rin ang ginagawa ng mga katutubo sa kabundukan ng Benguet kung saan pinapatay ang mga aso bilang alay.

“Sa gitna ng pagtaas ng rate ng pagmamay-ari at pag-aampon ng alagang hayop, mayroon ding isang makabuluhang pagtaas sa kalupitan at pagpapabaya sa hayop, at dahil dito ang pangangailangan para sa mas malakas na batas sa kapakanan ng hayop at mas mahusay na regulasyon ng gobyerno,” sabi ni Poe sa 1st Mars Global Adoption Weekend ginanap sa Shopwise Pet Fair sa Ayala Malls Circuit Makati kamakailan.

Sinabi ni Poe na patuloy na lalabanan ng FPJ Panday Bayanihan partylist ang anomang uri ng kalupitan, pagmamaltrato, at pang-aabuso sa mga hayop, bilang bahagi ng tatlong adbokasiya nito sa pagkain, progreso at hustisya.

Tulad ni Poe, ang Animal Kingdom Foundation, isang non-profit na animal welfare non-government organization, ay nakatuon sa pagpapabuti ng mga kondisyon ng pamumuhay at kapakanan ng mga hayop sa bansa at alisin ang malupit na kalakalan ng karne ng aso para sa pagkain ng tao. Ang mga tauhan ng AKF ay nanganganib ang buhay sa panghuhuli ng mga mangangalakal ng aso upang mailigtas ang mga nababagabag na aso sa Pilipinas.

Kaya sila’y nakikipagtulungan sa Philippine National Police, National Meat Inspection Service at sa local government units (LGUs) kapag kailangan nila ng awtoridad tuwing sasalakay sila sa mga establisyimento na sangkot sa illegal dog trading at pagbebenta ng karne nito. Dinadala ang mga nasagip na hayop sa AKF rescue center sa Capas, Tarlac.

Iniulat ng Euromonitor International na ang populasyon ng alagang hayop sa Pilipinas ay tumaas sa isang compound annual growth rate (CAGR) na 4 na porsiyento mula sa 56.3 milyong alagang hayop noong 2020 hanggang 65.9 milyong alagang hayop noong 2024, at inaasahang lalago ito sa 76.8 milyong alagang hayop pagsapit ng 2029.

Sa survey ng Social Weather Stations noong 2023 ay ipinapakita nito na 64 porsyento ng mga household ay may mga alagang hayop.

“Maraming kailangang gawin. Ito ay isang panawagan sa pagkilos para sa pagbabalangkas ng patakaran upang matiyak ang kalusugan at kaligtasan ng mga hayop sa Pilipinas, lalo na ang iba pang alagaing hayop na hindi ganap na sakop ng batas,” saad ni Poe.

Sinusuportahan din ni Poe-Llamanzares, unang nominado ng FPJ Panday Bayanihan party-list, ang Senate Bill No. 2458, na inihain ng kanyang ina na si Sen. Grace Poe, na naghahangad ng binagong Animal Welfare Act upang palakasin ang mga pamantayan sa kapakanan ng hayop, mga patakaran, mga tuntunin at regulasyon, at pagpapatupad, bilang gayundin ang pagbibigay ng mas mahigpit na parusa sa mga lumalabag.

Dapat din aniyang mayroong pet food regulatory standard para matiyak na ang kaligtasan at kalidad ng pet food ay garantisado sa lahat ng yugto ng proseso, mula sa manufacturing, sourcing, storage, package, at distribution.

Sa kasalukuyan ay may 37 aso ang nakalagak sa AKF Rescue Center sa barangay CubCub, Capas, Tarlac. Ngayong buwan ay tampok ang maagap na pagsagip sa asong si “Demi” at si “Geraldine” na balak katayin ng meat traders sa Bulacan.

Mababatid ang SB 2458, o “The Revised Animal Welfare Act,” ay naglalayong isama ang mandatory animal welfare education sa kurikulum para sa elementarya at sekondaryang edukasyon at pagbutihin ang kapasidad ng Departamento ng Agrikultura sa pagtugon sa mga isyu sa kapakanan ng hayop sa pamamagitan ng tamang kawanihan.