KINUMPLETO nina Geva De Vera at Chanelle Lunod ang pagwalis sa De La Salle, 3-0, para ihatag sa Ateneo ang ikalawang sunod na UAAP women’s badminton championship nitong weekend sa PNP Sports Center Badminton Courts.

Ikalimang korona na ito ng Lady Eagles, at tumabla sa karibal na Lady Shuttlers sa ikalawang pwesto ng may pinakamaraming badminton titles. Ang UP pa rin ang nananatili sa unahan sa hawak na nine crowns.

“Syempre, I am very, very happy. We did what we set out to do,” pahayag ni Ateneo head coach Kennie Asuncion. “Everybody covered for each other.”

Nilunod nina Lunod at De Vera ang tambalan nina Shayne Boloron at Palma Cruz, 21-11, 21-15 sa nag-iisang doubles match.

Naunang umabante ang Ateneo nang magwagi sa unang singles matches.

Bumawi si Lunod nang talunin si La Salle captain Iyah Sevilla, 21-14, 21-6 sa singles match.

Sinundan ng panalo ni rookie Mika De Guzman kontra kay Kanna Baba 21-13, 21-18.

Sosyo sina De Vera at Lunod sa Most Valuable Player honors sa ikalawang sunod na taon, habang si De Guzman ang tinanghal na Rookie of the Year awardee.

“For now, we will enjoy this (title). We will of course get back into it. Every year it gets harder, it gets challenging. But we will try our best to keep the title,” dagdag ni Asuncion.