PATULOY ang ginagawang pagbalasa ni House Speaker Lord Allan Velasco sa mababang kapulungan ng Kongreso at nagdagdag pa ito ng mga bagong posisyon para sa kanyang loyal allies.

Sa session kagabi, itinalaga bilang mga bagong Deputy Speaker sina Manila Rep. Bienvenido Abante, BH party-list Rep. Bernadeth Herrera, Pampanga Rep. Rimpy Bondoc, Zamboanga Rep.

Divina Grace Yu, Negros Occidental Rep. Arnolfo Teves, Ilocos Sur Rep. Kristine Meehan-Singson, Valenzuela Reps. Eric Martinez at Wes Gatchalian at Sarangani Rep. Rogelio Pacquiao.

Tinanggal naman bilang Deputy Speakers sina Pampanga Rep. Aurelio “Dong” Gonzales at Surigao del Sur Rep. Johnny Pimentel na mga kapartido ni Velasco sa PDP-Laban.

Gayunpaman, itinalaga bilang chairman ng Special Committee on Bases Conversion si Gonzales habang ang Special committee on strategic intelligence chairmanship ay ibinigay kay Pimentel.

Sinibak din bilang miyembro ng makapangyarihang Commission on Appointment (CA) si Laguna Rep. Benjamin Agarao at ipinalit ang isa sa mga loyal ally ni Velasco na si Sulu Rep. Munir Arbison.

Ibinigay naman kay Navotas Rep. John Rey Tiangco ang chairmanship ng House committee on trade and industry na dating pinamumunuan ni Gatchalian habang chairmanship ng committee on inter-parliamentary na dating hawak ni Yu ang ibinigay kay Rep. Sandra Eriguel ng La Union.

Ibinoto rin bilang chairman ng House committee on social service na dating hawak ni Eriguel si Quezon City Rep. Alfred Vargas habang pinalitan ni Pangasinan Rep. Tyron Agabas si Herrera bilang deputy majority leader.

Ipinalit naman si Anak Mindanao party-list Rep. Amihilda Sangcopan kay Singson na dating assistant majority leader. (BERNARD TAGUINOD)