CAVITE – Arestado ang isang lalaki makaraang pagnakawan ang bahay ng isang musician, habang dinakip din ang isa pang lalaki na pinagbentahan sa kinulimbat na mga kagamitan sa bayan ng Silang sa lalawigang ito, noong Linggo ng madaling araw.

Nahaharap sa kasong robbery ang suspek na si Jhay Lumanglas, ng Brgy. Acacia, habang paglabag sa Anti-Fencing Law naman ang inihain sa suspek na si Randy Encarnacion y Delos Reyes, 48, electrician, ng Bulihan, Silang, Cavite.

Ayon sa salaysay ng biktimang si Jay Layosa y Obera, isang musician ng Brgy. Acacia, dakong alas-tres y media noong Linggo ng madaling araw nang naalimpungatan siya sa pagkakatulog dahil sa kalabog at pagkaraan ay naaktuhan niya si Lumanglas na bitbit ang tinatayang P105,050 halaga ng mga kagamitan.

Nabatid na nakilala ng biktima ang suspek dahil ito rin umano ang tumangay ng kanyang Alto Speaker at JBL headphone na nagkakahalaga ng P28,950, sa nakaraang panloloob sa kanyang bahay.

Makaraang maaresto si Lumanglas ay ikinanta nito na ibinenta niya ang speaker at headphone kay Encarnacion na nadakip sa isinagawang follow-up operation.

(SIGFRED ADSUARA)