TAYABAS CITY – Patay ang driver ng tricycle at isang pasahero nito na isang teacher nang ang kanilang sasakyan ay salpukin ng isang dump truck sa lungsod na ito, noong Lunes ng umaga.

Dead on the spot ang driver na si Abner Pabellano, residente ng Silangang Palale, matapos ay magulungan ng huling gulong ng truck.

Nalagutan naman ng hininga bago pa mairating sa hospital ang teacher na si Hannah Shane De Ocampo na isa sa mga pasahero ng tricycle.

Batay sa report ng Tayabas City police, dakong alas-7:00 ng umaga, tinatahak ng tricycle ang Tayabas-Mauban Road ngunit pagsapit sa Barangay Kanlurang Palale ay sinalpok ito mula sa likuran ng kasunod na dump truck na minamaneho ni Christopher Padua Bermudo, 43, taga Barangay Masin, Tayabas City.

Nakaligtas at hindi naman nasaktan ang tatlo pang pasahero ng tricycle na sina Jimuel Cabalsa, 28; Wilfred Marco, 47, at Angelo De Luna, 23; pawang taga Barangay Mainit.

Ayon sa Tayabas Police, nawalan ng preno ang truck kaya nabangga nito ang nasa unahang tricycle.

Naaresto naman ng mga pulis ang driver ng truck na nahaharap sa kasong reckless imprudence resulting in multiple homicide and damage to property. (NILOU DEL CARMEN)