CAVITE – Patay ang isang construction worker nang pagsasaksakin ng kanyang kabaro makaraang nagtalo dahil sa kanilang trabaho sa Gen. Trias City sa lalawigan noong Linggo ng madaling araw.

Isinugod sa San Pedro Calungsod Medical Center ang biktimang si alyas “Joven” subalit namatay dahil sa mga saksak sa katawan.

Hindi naman nagawang makatakas ang suspek na si alyas “Dario”, isa ring construction worker, matapos arestuhin ng kanyang mga kabaro saka itinurn-over sa pulisya.

Ayon sa ulat, dakong aas-12:30 ng madaling araw nang mangyari ang insidente sa loob ng MSVB Construction Barracks sa Lancaster New City sa Brgy. Bacao 1, Gen Trias City.

Nagkukuwentuhan umano ang biktima at ang suspek kasama ang iba pa nilang kabaro.

Ngunit nauwi ang usapan sa kanilang trabaho hanggang sa hindi nagkaintindihan ang dalawa na humantong sa mainitang pagtatalo.

Pagkaraan ay kumuha umano ng kutsilyo sa kanilang barracks ang suspek at pinagsasaksak ang biktima.

Napigil naman ang pagtakas ng suspek nang arestuhin siya ng kanyang mga kabaro.

(SIGFRED ADSUARA)