(CHRISTIAN DALE/BERNARD TAGUINOD)

TILA hindi na makapaghintay si Pangulong Ferdinand Marcos Jr. na makarating sa kanyang tanggapan ang panukalang batas na lumikha sa Maharlika Investment Fund (MIF) para kanyang mapirmahan.

Sa isang pahayag, siniguro ng Pangulo na kanyang agad lalagdaan ang panukala, sa kabila ng mga pagtutol dito ng iba’t ibang sektor.

Aniya, kailangan muna niyang tingnan ang mga pagbabagong ginawa sa “approved version” ng Kongreso sa panukalang sovereign wealth fund, na aniya’y dapat independent mula sa gobyerno para maging matagumpay.

“I will sign it as soon as I get it,” ayon sa Pangulo sa isang chance interview.

“I think most of the changes that were proposed and eventually adopted really had to do with the safety and the security of people’s pension funds,” dagdag na wika nito.

“If the bill comes before me, I will sign it but the secret to its success is who do we put in management. What is their experience? What is their reputation? What is their success rate?” pagpapatuloy nito.

Aniya, ang susi para sa “sovereign, pension, and hedge funds to flourish rested on those who handle them. Most of problems with these funds typically stemmed from managers.”

Mahalaga aniya na ang Maharlika ay nago-operate bilang “independent fund”.

“The managers chose for it to happen, itong mga eskandalo na nakikita natin sa ibang lugar. On the other hand, we see examples of really successful funds and the… difference is the management,” ayon sa Pangulo.

“We have made sure that it is not a government, it is independent from the government. One of the changes that even I proposed to the House is to remove the President as part of the Board, remove the Central Bank chairman, remove the Department of Finance,” lahad nito.

Samantala, ang Maharlika fund ay mayroong initial capital na P500 bilyong piso mula sa Bangko Sentral, gaming revenues, at dalawang government-owned banks.

Labag sa konstitusyon

Samantala, para sa Makabayan bloc sa Kamara, paglabag sa saligang batas na idaan sa viber group ang correction sa kontrobersyal na MIF.

Dahil dito, nagbanta ang nasabing grupo na kanilang kukwestiyunin ang anti-democratic process na ginawa ng liderato ng Senado sa pet bill ni Marcos Jr.

“How can this be? Last time we checked, the Constitution does not allow legislation by Viber,” ayon sa statement ng Makabayan bloc matapos aminin ni Senate President Juan Miguel Zubiri na pinag-usapan sa kanilang viber group ang letter of correction sa nasabing panukala.

Sinabi ng grupo na hindi ito dapat palagpasin dahil malinaw sa saligang batas na lahat ng panukalang batas ay dapat dumaan sa Kongreso para pag-usapan sa komite at maging sa plenaryo.

Walang anilang nakasaad sa saligang batas na pwedeng idaan ang pag-amyenda sa isang panukala sa viber na binubuo lamang ng iilang tao.

“We will not allow this kind of legislative shortcut to continue, especially when it involves public funds and the welfare of our fellow citizens,” ayon pa sa grupo kaya tiniyak ng mga ito na magkakaroon ang mga ito ng legal na aksyon.

Ibibida sa SONA

Inaasahan naman ni House committee on ways and means chairman Joey Salceda na ibibida ni Marcos Jr., ang MIF sa kanyang ikalawang State of the Nation Address (SONA) sa July 24.

Kabilang sa mga inaasahan ni Salceda na ibibida ng Pangulo ang “strategic partners and co-investors” na magpapalakas umano sa stock market dahil ililista ito sa Philippine Stocks Exchange (PSE).

“Being listed in the stock exchange is also good for MIF, because it will subject the fund to greater public scrutiny, which encourages accountability,” ayon pa kay Salceda.