RAKET SA RENEWAL NG PASSPORT SA ABROAD, INALMAHAN NG MGA OFW

Aksyon OFW
0

AKSYON BANTAY OFW Ni FLORANTE ROSALES

SINO ba sa Department of Foreign Affairs ang nakaisip ng ‘raket’ sa pagproseso sa renewal ng pasaporte sa overseas Filipino workers sa abroad?

Bakit ito idinaan sa ilang outsourcing company ng DFA? Dumaan ba sa bidding process ang kontrata? Sinu-sino kaya ang mga opisyal na kumita rito?

Ito ang mga tanong ng galit na galit na mga OFW nang ­iparating sa inyong lingkod ang nasabing ‘raket’ umano na pahirap at dagdag gastusin sa kanila.

Tumataginting po kasi, mga ka-Saksi, na mula P4,900 hanggang P5,300 ang bayad sa bawat pasaporte na nire-renew sa ilang outsourcing companies sa walong siyudad sa Europe, Middle East, Amerika at Asia and the US.

Ipinarating ng AKO OFW advocates sa Italy ang nasabing ‘raket’ na umano’y hindi nila kayang magbayad ng ganito kataas na halaga ng pasaporte.

Kinastigo ng AKO OFW Italy Chapter ang Philippine Embassy sa Rome na umano’y binitiwan na nito ang trabaho na sila ang mag-process ng passport na ini-award sa BLS International Company.

Alam kaya ito nina DFA Secretary Teddy Locsin, Usec. Dodo Dulay at Usec. Sarah Lou Arriola? Mga boss, pakilinaw naman ito sa mga kabayani natin dahil hindi sila “tumatae” ng kwarta sa abroad para sa renewal ng pasaporte.

Sa ating pakikipag-ugnayan sa insiders sa Department of ­Foreign Affairs, kinumpirma nila ang dagdag na singil sa OFWs para sa passport renewal at nilinaw na ito ay “optional and voluntary” lamang.

Sa November 11 advisory ng Philippine Embassy sa Rome, sino mang Pilipino na kukuha at magre-renew ng passport sa BLS International ay sisingilin ng 35 Euros (P1,993) sa convenience fee, at 4.5 Euros (P256) para sa revolving fund.

Ito ay karagdagan sa kasalukuyang sinisingil sa passport ­renewal na 54 Euro o P3,075 kaya naman ang kabuuang gastos ng isang OFW ay aabot sa 93.5 Euro o P5,324. Kalabisan naman na ito, Sec. Locsin. ‘Di ka ba naaawa sa mga kabayani nating pinadapa na ng pandemya ay pipigain nyo pa nang todo ang bulsa. ­Malaking kabawasan na po ito, Secretary, para sa ordinaryong OFW na nagpapadala ng pera sa kanilang mga pamilya sa Pilipinas.

Nanindigan si Josephine Borja Duque, country chairperson ng AKO-OFW party-list Italy Chapter na sa halip ipasa ng DFA ang trabaho nila sa outsourcing companies, dapat nag-hire na lang sila ng dagdag na mga staff para naiwasan ang dagdag-pasanin ng mga kawawang OFWs.

Bukod sa Rome, binuksan din ng DFA ang PARC program nito sa Philippine embassies and consulates sa Dubai at Abu Dhabi sa UAE, Riyadh at Jeddah, Saudi Arabia, Doha sa Qatar, Los Angeles, California, USA, at Kuala Lumpur, Malaysia simula pa noong 2019.

Abangan ang paliwanag ng mga opisyal ng DFA sa hinaing na ito ng mga bagong bayani na pinahihirapan at ginagatasan pa nang husto ng ahensya.

***

Good News!

Nakauwi na sa bansa ang 240 “distressed” overseas Filipino workers mula sa Kuwait.

Sa tulong ng Department of Foreign Affairs, lulan ang mga Pinoy repat ng Kuwait Airways flight KU 417 na lumapag sa NAIA 1, pasado ala-4 ng hapon noong Martes.

Sasailalim naman ang mga repat OFW sa health and medical protocols base sa kautusan ng IATF.

Para sa inyong suhestiyon, komentaryo at reaksyon sa kolum na ito, ipadala lang sa dzrh21@gmail.com.

Read More

PANIBAGONG HAMON KAY RED MARIÑAS

0

BISTADOR Ni RUDY SIM

MULING sasabak sa panibagong hamon ang ­dating opisyal ng Bureau of Immigration (BI) na si Marc Red Mariñas matapos ang maraming pagsubok sa buhay na pinagdaanan nito.

Hindi man pinalad noong 2019 elections bilang alkalde ng lungsod ng Muntinlupa ay muli itong bumangon sa kagustuhang makapaglingkod sa Muntinlupeños na mabigyan pa ng mas maayos na serbisyo lalo ngayong panahon pa rin ng pandemya at dumaraan pa rin sa kahirapan ang bawat barangay.

Bagama’t ginagamit ng kalaban nito sa pulitika ang pagkakadawit nito sa Pastillas Scheme ay lakas loob na sinagot ni Mariñas na siya ay hindi nakasuhan sa Ombudsman sa naturang kaso at katunayan ay pinagkalooban siya ng ­clearances mula sa BI at Ombudsman na wala itong naging kaso sa gobyerno sa loob ng 15 taon serbisyo.

Mula nang magbitiw si Mariñas bilang deputy commissioner at Port operations division chief noong 2018 ay pinalitan siya bilang POD Chief ni Grifton Medina. Ngunit dahil sa hindi hinayaan nina Mariñas at Medina na ­manaig ang korapsyon sa airport ay ­nahaluan ng pulitika ang isyu ng Pastillas kung saan sa kagustuhang makaporma ng ilang sindikato sa airport na ­magpayaman at makuha ang dating puwesto ni
Mariñas ay nagkaisa ang ilang mga ­tiwaling tauhan sa ahensya at isang mambabatas upang siraan ang mga dating opisyales at maging mabango sila sa publiko.

Ngunit sa pamamagitan ni DOJ Secretary Menardo Guevarra ay hindi niya hinayaang manalo ang sindikato na kinabibilangan ng isang alias SirRAULo upang makapuwesto sa airport.

Sa tatlong dekada ko na bilang mamamahayag na naka-­assign sa BI ay nakita ko kung paano nagbigay ng serbisyo-publiko ang mga Mariñas.

Ang ama ni Red ay isang ordinaryong intelligence agent ng ahensya na naglingkod ng ilang dekada at marami itong ­naarestong mga ilegal na
dayuhan upang mapanatili ang national security ng ating bansa hanggang sa magretiro na walang ano mang kasong kinasangkutan.

Kung kaya’t naging idolo ni Red Mariñas ang kanyang ama na makapaglingkod sa mamamayan. Hindi man ugali ni Red ang gumanti sa
kanyang mga kalaban sa pulitika laban sa kanilang mga paninira ay kagaya ito ni Bongbong Marcos na may respeto sa kapwa at pinalaki ng kanilang magulang na may takot sa Diyos at taos-pusong paglilingkod sa kapwa.

Para sa inyong sumbong at reaksyon, maaaring i-text ako sa 09158888410.
(ANG mga ipinapahayag sa kolum na ito ay ­sariling opinyon ng sumulat at hindi ­saloobin ng pahayagang SAKSI Ngayon – Patnugot)

Read More

PUSPUSAN, PASPASAN

0

SA kabila pa ng pagbuhos ng suplay ng COVID-19 vaccines, nananatiling usad-pagong ang pagbabakuna sa mga Pilipino, dahilan sa likod ng pagkaantala ng pagbangon ng bansa mula sa dusang dala ng pandemya.

Kung noon, suplay ang palusot ng administrasyon sa mabagal na pagbabakuna, ngayon tambak na ang suplay na karamihan ay libreng nakukuha mula sa mga bansang mapagkawang-gawa, wala nang dahilan ang gobyerno sa kanilang palpak na sistema.

Paandar pa ni vaccine czar Carlito Galvez, magagawa nilang mahagip ang target na 54 milyon bago matapos ang taon, bagay na dapat lang niyang panindigan lalo pa’t nagsimula na rin ang bakunahan sa mga kabataang edad 12 hanggang 17.

Sa kabagalan ng gobyerno, hindi malayong muling sumipa ang bilang ng mga positibo batay mismo sa pahayag ni Dr. Ted Herbosa na tuma­tayong medical adviser ng National Task Force against COVID-19 (NTF).

Ang totoo, sa pagsipa ng bakunahan para sa 12-17 age group, naiwan naman ang mga paslit na edad 11 pababang walang ano mang kalasag kontra pandemya dahil hindi pa naman pinahihintulutan ang pagtuturok ng bakuna kontra COVID-19 sa mga ­paslit.

Ang siste, napa­aga ang pagluluwag ng ­gobyerno sa ha­ngaring buhayin ang ekonomiya at makalikom ng pondo – sukdulang ilagay sa peligro ang mga kabataang pag-asa ng kinabukasan.

Higit na kailangan ang bakunahang puspusan at paspasan na pwede lang maisakatuparan kung ang sistema ay may kaayusan at walang pinapaborang lalawigan. Hindi dapat sukatan ng prayoridad ang bilang ng botante sa pagbibigay ng bakunang proteksyon ng sambayanan.

Hay naku… ang bayan ni Juan!

Read More

TRESPASSING SA 3 SEKYU NA PUMASOK SA BAHAY NA MAY BAKOD

0

TAKOT na takot ang isang ginang matapos pasukin ang bahay na kanilang tinitirahan na nakabakod, ng tatlong kalalakihan na pawang mga armado ng baril noong nakaraang Lunes, Nobyembre 22, 2021.

Ang tinutukoy po natin ay ang bahay ni Arlene Espenera ng Upper Bangkal, Brgy. Isidro, Rodriguez, Rizal.

Ipinarating sa PUNA ang kanilang reklamo kaugnay sa ginawa ng tatlong guwardiya ng Silver Griffin Security na may tanggapan sa No. 17 A. Martin St., Brgy. Tugatog, Malabon City na pumasok sa likurang bahagi ng bahay ni Ginang Espenera sa nabanggit na address.

Sinikap ng PUNA na malaman ang detalye ng pangyayari kaya tinungo natin ang tanggapan ng pulisya sa Rodriguez, Rizal na agad namang nagresponde sa lugar.

Base sa pahayag ni Ginang Espenera, sa mga pulis at media, nagkataon ng panahon na ‘yun ay nasa Bulacan sila ng kanyang mister, takot na takot daw ang kanyang tiyahin kaya ipinatawag sa kanya ang kanilang kaibigan para sabihin ang ginawang pagpasok ng tatlong kalalakihang armado.

Ayon kay Misis Espenera, sa gilid na bahagi ng kanilang bahay na kung saan ay masukal, dun pumasok ang tatlong kalalakihan kaya nagdulot ito ng takot sa kanyang tita.

Nang makapasok na raw ang tatlong kalalakihan na pawang armado ay sinabing magbabantay sila sa tinitirikan ng kanilang bahay na nakabakod para mabantay­an at hindi makapasok ang ibang mga magtitirik ng bahay o squatter.

Inamin ng tatlong kalalakihan na ipinadala sila ng isang nagngangalang Allan Cruz na umano’y nagpakilalang may-ari ng lupa na kinatitirikan ng bahay ni Ginang Espenera.

Sa panayam ng PUNA kay Ginang Espenera, ma­tagal na nilang nabili ang lote na may lawak na 9,646 square meter sa isa nilang kaibigan na nangailangan ng pera.

Kaya agad nila itong pinabakuran at tinayuan ng bahay na kung saan ay namili sila ng scrap, ilang taon na ang nakalipas.

Nabigla na lamang sila nitong nakaraang Lunes ay biglang pinasok ang kanilang bahay na may bakod, ng mga tauhan ng Silver Griffin Security nang walang pahintulot sa kanila.

Tsk! Tsk! Tsk! Trespassing ginawa n’yo mga boy.

Para maging patas ang ating panulat, ay sinikap natin makuha ang panig ng Silver Griffin Security at nakausap natin sa cellphone si Mr. Wilfred Martin, ang may-ari ng agency.

Ibinigay niya sa PUNA ang cellphone number ng kanyang tauhan na si Arnel Lopez, supervisor/inspector ng Silver Griffin Security Agency.

Sa phone interview kay Ginoong Lopez, kumuha raw ng security services si Engr. Allan Cruz ng Jac Xyris na matatagpuan din sa lugar ang opisina.

Sinabi ni Lopez na may ipinakita raw na mga dokumento si Engr. Cruz kaya pumayag sila na maglagay ng kanilang guwardiya sa loob ng bakod ng bahay ni Ginang Espenera.

Ayon pa sa kanya, kaya raw pinalalagyan ni Engr. Cruz ng mga guwardiya ang lugar na nakabakod na kung saan may bahay si Ginang Espenera, para hindi mapasok pa ng ibang magtitirik ng bahay sa lugar.

Sina Allan Cruz, Ronnie Roxas at Roselo Espenera (asawa ni Arlene Espenera) ay minsan nang nagharap sa Brgy. San Isidro noong Pebrero 24, 2021 kaugnay sa usapin ng quarrying sa lugar.

Hindi nagkasundo ang dalawa kaya nagbigay na lamang ng certificate to file ang Brgy. San Isidro na pinirmahan nina Melencio Tolentino, Sr., Lupon Head; Nora Oro, Pangkat Chairman, at Hon. Karen Mae Hernandez, punong baran­gay ng Brgy. San Isidro.

Sinabi pa ni Ginang Espenera na minsan na sila ­inalok ni Cruz na bayaran sila ng P400K para lamang iwanan ang kanilang lugar subalit hindi sila pumayag dahil malaki na ang kanilang hirap sa pag-aalaga at ginastos sa nasabing lote.

Sinikap din natin na makuha ang panig ni Engr. Allan Cruz subalit hindi ibi­nigay sa atin ang contact number niya ng mga guwardiya na nakatalaga sa nabanggit na lugar.

Nililinaw lang po ng PUNA na wala po tayong pinapanigan kundi sa totoo lang po tayo, kaya pilit po nating kinukuha ang magkabilang panig.

Ang tanong po natin sa PNP-SOSIA, ano po ang parusa sa mga security agency na mapapatunayang nag-trespass sa loob ng bahay na nakabakod?

oOo

Para sa suhestiyon at reaksyon, mag-email sa ­joel2amongo@yahoo.com o mag-text sa cell# 0919-259-59-07.

Read More

CREDIT GRABBER

0

NAPAPANSIN ko na kapag panahon ng eleksyon, ang daming pulitiko na credit grabber para ipakita marahil sa taumbayan na meron silang nagawa kaya dapat iboto uli sila.

Kung napapansin n’yo, may mga reeleksyunista na ipinangangalandakan sa kanilang political ads na kesyo sila ang gumawa ng batas na ganito, batas na ganyan para ipakita na may accomplishment sila.

Parang sila lang ang nagtrabaho at hindi binigyan ng kredito ang mga kasamahan nila sa Kongreso na nagkaroon ng malaking bahagi at papel kung bakit naging batas ang isang panukala.

Para sa kaalaman ng lahat, hindi lang gawa ng isang senador o congressman ang isang batas kundi pinagtulungang ipasa ‘yan ng buong miyembro ng dalawang kapulungan ng Kongreso.

Merong kokontra pero iilan lang at dahil mas marami ang bumoto ng pabor sa isang panukala, naipapasa ‘yan pero kung mas marami ang hindi pabor, sa archive division ‘yan itatambak.

Dahil bicameral ang sistema ng paggawa ng batas, hindi magiging batas ang isang panukala na ipinasa sa Kamara kung walang counter bill na maipasa sa Senado o vice versa.

Kailangang may kahalintulad na panukala ang naihain ni Senador sa Kamara dahil kahit maipasa sa kanilang kapulungan ang kanyang panukala kung walang congressman na makaisip sa kanyang naisip ay walang mangyayari.

Ibig sabihin, may papel sina congressman sa isang panukala na naging batas dahil may naipasang countermeasures ang mga senador at dumaan pa ‘yan sa ­bicameral conference na binubuo ng mga appointed member mula sa Senado at Kamara.

Bago ‘yan, ipapasa muna ‘yan sa committee level na may mga chairman at miyembro bago dalhin sa plenaryo para pagbotohan ng buong miyembro ng kapulungan at kung hindi type ni chairman o ng Speaker of the House at Senate President ang isang panukala, mababaon ang panukalang ‘yan sa archive.

Kaya concerted efforts ng mga senador at congressmen ang isang panukala kahit ang naghain o nagpanukala ay isang mambabatas lang kaya hindi dapat angkinin ni Congressman o ni Senador ang isang panukala.

Pero kung angkinin ni re-electionist senator o reelectionist congressman ang kredito ay parang sila lang ang naghirap at hindi binigyan ng kredito ang mga kasamahan lalo na ang chairman ng komite na nagpasa at nagdepensa sa kanyang panukala.

Okey lang siguro na sabihin na siya ang nagpanukala sa batas na ‘yan pero dapat bigyan din niya ng kredito ang naghain ng kahalintulad na panukala sa kabilang kapulungan.

Kaso hindi ko ‘yun ­naririnig sa kanilang mga political advertisement. Inaangkin nila ng buong-buo ang isang batas lalo na kung ito ay maayos na naipapa­tupad at napapakinabangan ng taumbayan.

Parang ipinapalabas nila na sila lang ang nagtrabaho at kung wala sila, hindi ‘yan magiging batas kaya dapat tayong magpasalamat sa kanila at kailangan nating iboto ulit sila…. ganun ba ‘yun?

At ang napapansin ko pa ha, walang reelectionist solons ang nagsasabi na sila ay ang nasa likod ng mga batas na nagpapahirap sa mga tao tulad ng mga karagdagang buwis.

Read More

BENTAHE NG ADMINISTRASYON

0

HINDI biro ang gastos ng mga kandidato para sa pagiging Pangulo.

Bigla sumagi sa isip ng publiko si dating ­Pangulong Fidel Ramos na minsang nagsabing tumataginting na P5 bilyon ang kailangan ng isang presidential candidate para ­makapaglunsad ng isang epektibong kampanya – nang walang katiyakang mananalo liban na lamang kung gagamitan ng salamangka, pandaraya at pagbili ng boto.

Dito lamang ang administrasyon. Nasa kanila ang kakayahang makalikom ng pondong kailangan para sa publisidad gamit ang campaign advertisements sa telebisyon, radyo, ­peryodiko at maging sa social media kung saan nagkalat ang trolls na posibleng binabayaran gamit ang pondo ng gobyerno.

Kamakailan lang, naglabas ng ulat ang grupong “Right to Know,” na kinabibilangan ng certified public accountants (CPA) at mga abogado.

Ayon sa grupo, nasa P5.12 bilyon ang buwis na nagawang iwasan ng Pharmally Pharmaceutical Corporation para lang sa taong 2020.

Ang Pharmally na nakasungkit ng bilyon-bilyong transaksyon sa gobyerno sa gitna ng pighati ng mga mamamayang Pilipino, ay higit na kilala sa likod ng overpriced at substandard na face shields na binili ng gobyerno mula sa kanila.

Ito rin mismo ang kumpanyang ayon sa Securities and Exchange Commission (SEC), ay mayroon lamang paid-up capital na P600,000.

Nagawa nilang makuha ang kontrata kahit pa pinakamahal ang presyong alok nito sa Department of Budget and Management (DBM) na nangasiwa ng moro-morong bidding sa gitna ng pandemya.

Magkano nga ulit? P5.12 bilyon ba kamo? Sa puntong ito, hindi maiwasan isiping sadyang pinlano ang maanomalyang transaksyon bilang paghahanda sa eleksyon.

Kanino nga ba pumasok ang salaping katumbas ng buwis na dapat bayaran ng Pharmally?

Isa lang ang malinaw, hindi lamang sa transaksyong Pharmally kumita ang mga tiwali sa gobyerno. Maging sa pagbili ng rapid test kits sa unang bugso ng pandemya, pihadong may tiba-tiba. Pati sa PhilHealth, syento-por-syento may kumita.

At sa bakuna? Siyempre naman!

Hindi pa kasali sa kwenta ng “Right to Know” ang halaga ng tinatawag na SOP na komisyon sa mga imprastraktura ng gobyerno.

Oops, meron pa – donasyong sapilitan mula sa mga kapitalista.

Read More

SABI NI REP. EDDIE VILLANUEVA, SMUGGLING AT TAX EVASION PROBLEMA, ‘DI E-SABONG!

0

SABONG ON AIR Ni KA REX CAYANONG

KILALANG kumokontra si House Deputy Speaker at ­CIBAC Rep. Eddie Villanueva sa e-sabong o online sabong.

Sabi ni Villanueva, mas malaki raw ang negatibong epekto ng online gambling sa lipunan kaysa inaasahang kikitain dito ng ­gobyerno.

Kung gustong kumita ng pamahalaan, mas maigi raw aniya kung tingnang maigi ang loopholes sa revenue-generation functions nito.

Tingnan daw dapat ang smuggling at tax evasion ng mga kompanya.

Sa ganitong paraan, mas makakakita raw ito ng government resources.

Hindi raw makabubuti ang e-sabong.

Excuse lang daw ito ng mga kapitalista sa mga pansarili nilang interes.

Ang nagdurusa aniya ay ang mga mahihirap at napupunta sa wala ang kinikita nila.

Kung aaprubahan daw ng Kongreso ang prangkisa ng mga kompanya ng e-sabong, hindi raw malayo na kumuha na rin ng prangkisa ang iba pang uri ng online gambling sa nalalapit na panahon.

Nakatutuwa naman itong si Villanueva.

Natatawa na lang talaga ako.

Matagal na pala niyang nakikita ang smuggling at tax evasion bilang isa sa mga pinakamalaking problema ng bansa.

Aba’y bakit hindi niya isinulong noon pa na durugin ang smugglers? Bakit hindi siya gumawa ng batas na may kinalaman dito dahil mambabatas naman siya?

Ang totoo, ang sabong ay matagal nang libangan ng mga tao at wala namang nagra-rally para tutulan ito.

Hindi kasi alam ni Cong. Villa­nueva na isa rin ang sugal o sabong sa mga sumusuporta sa black market.

Ang sabong sa mga probinsya ay hindi lamang libangan kundi source of income rin ito ng mga mahihirap nating kababayan.

‘Yung mga simpleng walang pinag-aralang mahihirap ay kumikita rito sa pamamagitan ng job opportunities na handog ng sabong.

Ang mga nagsusulong naman ng e-sabong gaya ng Pitmaster Foundation, Inc. ay matagal nang tumutulong sa mga mahihirap na bayan sa bansa.

Malamang hindi nakikita ni Villanueva ang mga ganitong benepisyo dahil hindi niya rin siguro ginagawa ito o ‘yung pagtulong.

Matagal nang tumutulong ang Pitmaster sa mga munisipalidad na walang ambulansya.

May handog din itong libreng dialysis sa mga mahihirap na pasyente na walang kakayahang tustusan ito.

Kaya nawa’y makita ni Villanueva ang mga ganitong aspeto at maging ang magandang dulot ng e-sabong sa marami nating mga kababayan.

Read More

PINATULOG NG OMBUDSMAN

0

SAKSI NGAYON INSIDER Ni FERNAN ANGELES

TALIWAS sa akala ng marami, hindi lamang sa Malakanyang may antukin. Maging sa Office of the Ombudsman, ­naging kalakaran ang pagtulog – hindi ng mga kawani kundi ng kasong isinampa sa kanilang tanggapan.

Agosto 1998 pa nang ihain ang isang detalyadong asunto kaugnay ng maanomalyang pagbebenta ng Philippine Esta­tes Authority (Philippine ­Reclamation Authority na ngayon) sa 41.6-ektaryang reclaimed area ng Manila Bay sa Manila Bay Development Corporation (MBDC) sa halagang P104 kada metro kwadrado.

Giit noon ng PEA, ang MBDC ang nakapag-alok ng “best offer” para sa prime property na ngayon ay mayroong market value na nagkakahalaga ng P300,000 per square meter.

Sa kabuuan, binayaran lamang ng P427 milyon ng MBDC ang gobyerno para sa 41.6-ektaryang reclaimed area sa lugar kung saan ngayon nakatayo ang naglalakihang gusaling karamihan ay pag-aari ng mga negosyanteng Intsik. Malayong-malayo sa P41-bilyong market value noong panahon na iyon.

Ang siste, hindi man lang tumabla ang gobyernong gumastos ng P9.8 bilyon para sa pagtatabon, pagpapatibay ng pundasyon at pagpapatag ng silangang baybayin ng Manila Bay.

Ang malinaw, matagal nang nasa pag-iingat ng Ombudsman ang sako-sakong ebidensya at testimonya ng mga saksi, bagay na hindi man lamang pinahalagahan ng Ombudsman na hanggang ngayon ay nirerebisa pa rin daw ang inihaing kaso.

Susmaryosep! ­Nangamatay na ang mga tiwaling sangkot, pati na rin ang ilan sa mga ­naghain ng reklamo. Marahil hinihintay ng nasabing tanggapan ang pagpanaw ng lahat ng mga sangkot sa asunto sa hangaring pagbigyan ang kapritso ng mga negosyanteng naka-jackpot sa tulong ng mga tiwali sa PEA.

Dalawampu’t tatlong taon! Napakahimbing ng ginawang pagpapatulog ng Ombudsman sa asuntong plunder laban sa mga tiwali sa pamahalaan. Mas mahimbing pa kaysa pasyenteng na-comatose!

Kung tutuusin, pwedeng-pwedeng ibasura ng administrasyon ang kontratang sukdulang bahid ng anomalya. Talo ang gobyerno.

Napakalaking pera para sa naghihirap na Pilipino kung mababawi, makakansela, o ‘di naman kaya’y madadagdagan ang baryang ibinayad ng MBDC para sa isang klasipikadong prime property sa tabi mismo ng Manila Bay.

Sa pinakahuling datos na aking nakalap, swerte na ngayon ang isang negosyante kung makabili siya ng lupa sa halagang P300,000 per square meter sa nasabing lugar.

Nasusulat din sa Saligang Batas – Article XII, Sec. 3 ng Konstitusyon – mahigpit na ipinagbabawal ang pagbebenta ng alienable lands at public domain sa mga pribadong ­kumpanya. Gayunpaman, pwede lamang itong paupahan.

Pero hindi gagawin ‘yan ng administrasyong Duterte.

Magtatampo kasi ang mga negosyanteng dumadayo pa sa Pilipinas mula sa bansang Tsina para magsamantala.

(Si Fernan Angeles ay editor-at-large ng SAKSI Ngayon)

Read More

PAG-APRUBA SA PONDO NG LALAWIGAN NG QUEZON, PINALAGAN

0

IPINAGTATAKA ng iba pang miyembro ng Sangguniang Panlalawigan (SP) ng Quezon ang ginawang paspasang pag-apruba ng apat lamang na mga dumalong miyembro ng (SP) sa ­pangunguna ni Bokal Donaldo “Jet” Suarez, anak ni Quezon Governor Danilo Suarez, ang nakabinbing 2021 revised provincial annual budget na P4,157,830,020, sa isang special session.

Una rito, binuo ng konseho kasama si Vice- Governor ­Samuel Nantes, ang kapulungan bilang committee-as-a-whole sa ­kuwestyunableng special session.

Bukod kay Bokal Suarez, dumalo rin ang tatlo niyang ­kaalyado sa Minority Bloc na sina Bokal Alona Obispo, Yna Liwanag at Rhodora Tan.

Kaagad ding idinaos ang marathon committee hearing at special session, makaraang mapatawan naman ng 60- day suspension noong Nov. 11, ng Department of the Interior and Local Government (DILG) base sa kautusan ng Office of the President, ang walong Bokal na bumubuo ng Majority Bloc, dahil sa mga reklamong abuse of authority, oppression at grave misconduct.

Samantalang ang ika-13 Bokal na si Reynan Arrogancia na kabilang din sa majority bloc na ‘di nakasama sa napatawan ng suspensyon, ay hindi nakiisa sa nasabing committee hearing at special session.

Sa kabila aniya nito’y ipinasa pa rin ng apat na SP ang provincial annual investment plan para sa 2022 na nagkakahalaga ng P5,331,658,038 na siyang pagbabasehan sa proposed annual budget para sa susunod na taon.

Ayon sa tumatayong leader ng Majority bloc na si Bokal Sonny Ubana, wala sa kanila ang pagkukulang kung bakit hindi naipasa ang panukalang 2021 annual budget. Sinunod lamang umano nila ang mga proseso at alituntunin na itinakda ng batas hinggil sa pagtitiyak na magagastos nang tama ang salapi ng lalawigan.

Malinaw aniya na batay sa kanilang ginawang pag-aaral, mayroong mga probisyon sa Annual Proposed Budget na hindi tumutugma sa orihinal na Annual Investment Plan na nauna nang naaprubahan ng konseho.

Paliwanag ni Bokal Ubana, na may nakita umano sila na halos P200M-P300M na disconnected o hindi tugma sa orihinal na plano na dapat pagkagastusan ng pondo.

Pangalawa, hindi detalyado ang malaking bahagi ng proposed budget lump sum. Nakasaad sa Budgetary Regulation na dapat detalyado ang lahat ng gastusin, anong proyekto, at saang bayan o barangay ito gagamitin.

Pangatlo, hindi umano tugma ang nakapaloob na mungkahing budget doon sa mensahe ng gobernador (Executive Message). Nakasaad sa mensahe na “This budget seeks to provide response and recovery for COVID”. Subalit nang bulatlatin ang nilalaman nito ay nakita nila na halos lahat ng provincial hospital ay nabawasan pa ng halos 40% ang MOOE (maintenance and other operating expenses), samantalang ang halos lahat ng hospital sa probinsiya at may karga naman na halos P40M pondo para sa dagdag na casual, job order, sa ilalim ng Governor’s Office.

Sapat na umano itong mga kadahilanan para hindi nila ipasa ang naturang budget proposal.

Dagdag pa ni Bokal Ubana, mayroon aniyang sapat na panahon ang Office of the Governor upang repasuhin at baguhin o gawan ng revision ang na-disapproved na budget proposal at mabigyan ito ng pagkakataon na maaprubahan subalit hindi ito ginawa ni gobernador Suarez at sa halip ay inakusahan pa ang konseho ng pamumulitika.

Iginiit ni Bokal Sonny Ubana na ang paghahain ng kaso laban sa kanilang walo para sa kanilang suspensyon ay malinaw na paraan ng gobernador upang pilayin sila at hindi tuluyang magampanan ang kanilang tungkulin na bantayan at siguraduhing nagagastos nang tama ang pondo sa lalawigan ng Quezon.

Read More