INANUNSYO ni Navotas City Congressman John Rey Tiangco na positibo siya sa COVID-19 makaraang lumabas sa kanyang RT-PCR test na kumpirmado ang naging resulta nito.

Sa post niya sa kanyang Facebook account, unang sinabi ni Cong. Tiangco na nagpositibo siya sa kanyang antigen test kaya’t agad siyang nagpa-RT-PCR test.

“Mabuti naman po ang aking pakiramdam at kasalukuyan po akong naka-quarantine. Patuloy po akong magbibigay ng ulat sa inyo tungkol sa aking kalagayan,” ani Cong. Tiangco.

Nanawagan siya sa kanyang mga nakasalamuha na mainam na magpa-swab test para sa kanilang kaligtasan. Libre aniya ang RT-PCR swab test at makipag-ugnayan lamang sa kanilang barangay o health center.

“Sa kabila ng lahat ng aking pag-iingat, hindi pa rin po ako nakaligtas sa virus na ito. Sabi nga nila, OA ako dahil doble-doble ang aking face mask, ‘di ako umiinom o kumakain kapag nasa labas at nagbibihis at naliligo agad pagdating ng bahay. Gayunpaman, nahawaan pa rin po ako. Kaya higitan n’yo pa po ang inyong pag-iingat, lalo na kung ‘di talaga maiwasang lumabas ng bahay para magtrabaho” pahayag ni Cong JRT.

“Gagawin ko po ang lahat ng aking makakaya para maipagpatuloy ang aking mga tungkulin at mga programang ating nasimulan” dagdag niya.

Nagpapasalamat ang mambabatas sa lahat ng mga nag-aalala at mga nanalangin para sa kanyang paggaling sa lalong madaling panahon.

“Sa awa ng Panginoon, malalampasan din po natin ang pagsubok na ito!” aniya pa. (FRANCIS SORIANO)