KINUMPIRMA ng Malakanyang ang pagkakatalaga kay PLTGEN Vicente Dupa Danao, Jr. bilang Officer-in-Charge ng Philippine National Police (PNP), epektibo Mayo 8, 2022.

“We are confident that General Danao will continue efforts to transform the PNP into a more dynamic and more professional organization performing its mandate of serving and protecting our people,” ayon kay Acting Presidential Spokesperson at Presidential Communications Secretary Martin M. Andanar.

Nauna nang inanunsyo ni Interior and Local Government Secretary Eduardo Año ang pagkakatalaga kay Danao bilang OIC ng PNP kaugnay ng pagreretiro sa serbisyo ni PNP chief Gen. Dionardo Carlos sa darating na Mayo 8, o isang araw bago ang halalan.

Sa ulat, nabanggit na ng Kalihim na dalawang pangalan ng PNP officers ang kanyang isinumite kay Pangulong Rodrigo Roa Duterte kabilang si PNP Deputy Chief for Operations Danao Jr., na miyembro ng Philippine Military Academy (PMA) Class of 1991.

Naiulat din na kung ang PNP leadership ang susundin, si PNP Deputy Chief for Administration Lt. Gen. Rhodel Sermonia ng PMA of 1989 ang otomatikong susunod sa pwesto. Lumabas din ang pangalan ni National Capital Region Police Office Chief M/Gen. Felipe Natividad na miyembro ng PMA Class of 1990. (CHRISTIAN DALE)