INILIPAT ng pamunuan ng Philippine National Police si dating PNP spokesperson Brigadier General Jean Fajardo sa Mindanao.

Base sa pinakahuling reassignment order na ipinag-utos ni PNP acting chief, Lieutenant General Jose Melencio Nartatez Jr., inalis si BGen. Fajardo bilang Director ng Directorate for Comptrollership at itinalaga sa Area Police Command-Eastern Mindanao.

Kasama ni Fajardo na dinala sa Area Police Command-Eastern Mindanao si Brigadier General Leon Victor Rosete.

Samantala, hinirang namang kahalili ni Fajardo si Major General Westrimundo Obinque na mistah ni Nartatez.

Habang ipapalit naman sa nabakanteng puwesto ni Obinque si Major General Christopher Birung bilang pinuno ng National Police Training Institute, epektibo nitong nakalipas na Sabado, Setyembre 6, 2025.

Ang nasabing lipatan ay kabilang sa unang reshuffle na inutos ni Nartatez na ipatupad sa kanyang pagrenda sa PNP.

Magugunitang para wala umanong tila redundancy sa position ay itinalaga rin ni Nartatez si PNP-Public Information Office chief Brigadier General Randulf Tuaño na magsilbing tagapagsalita ng pambansang pulis. (JESSE RUIZ)