NAGSAMPA ng kaso ang United Pilipinos Against Crime and Corruption (UPACC) nitong Huwebes sa Office of the Ombudsman laban kay Magalang, Pampanga Mayor Malu Lacson at 10 iba pang lokal na opisyal at indibidwal.

Kabilang sa pinangalanan bilang respondents sa mga reklamo sina Municipal Administrator Norman Lacson; Municipal Environment and Natural Resources Officer Paul Elmer Market;

Konsehal Ruben Miranda; Navaling Barangay Chairman Juanito Napo; at mga miyembro ng Magalang Task Force, kasama sina Dr. Inold Cross, Edward Lathe, Engr. Jesus Nathaniel Pili, at Rizalino Ocampo.

Kasama rin sina Jose Tiburcio Canlas, isang accountant sa City of San Fernando, at Odilon Lacson, treasurer ng Kingsmen Manpower and General Services Inc.

Sinabi ni Pyra Lucas, Tagapangulo ng UPACC, ang mga reklamo ay may kaugnayan sa umano’y ilegal na operasyon ng Chuangxing Steel Corporation.

Sinabi ni Lucas, ilang manggagawa ng Chuangxing Steel, na nagtatrabaho sa pamamagitan ng Kingsmen Manpower at Bantayan Manpower Agency, ang humingi ng tulong sa UPACC dahil sa umano’y pagmamaltrato at paglabag sa kanilang mga karapatan sa paggawa.

Iginiit din niya na ang mga dokumentong nakuha ng grupo ay nagpapakita na si Mayor Lacson at ilan sa iba pang mga respondent ay nagmamay-ari umano ng Kingsmen Manpower, na ayon sa UPACC ay maaaring maituring na isang conflict of interest.

Iginiit pa ni Lucas na natuklasan sa imbestigasyon ng Senado na ang Kingsmen Manpower ay hindi akreditado ng Department of Labor and Employment.

Aniya, ang pagpapadala ng mga manggagawa ng kumpanya sa Chuangxing Steel ay maaaring maituring na paglabag sa batas laban sa ilegal na recruitment.

Isa pang isyung itinaas sa mga reklamo ay ang umano’y ilegal na land qualification sa inookupahan ng Chuangxing Steel sa Barangay Navaling.

Ayon kay Lucas, ang lugar ay orihinal na inuri bilang residensyal, at walang inilabas na land conversion order bago umano ito ginawang industrial site.

Hiniling din ng UPACC sa Ombudsman na imbestigahan ang inilarawan ni Lucas na hindi maipaliwanag na kayamanan ng alkalde.

Inakusahan niya na ang idineklarang mga ari-arian ni Lacson ay tumaas ng sampung beses sa loob ng tatlong taon at ang kanyang Statement of Assets, Liabilities and Net Worth mula 2022 hanggang 2025 ay lumampas sa P154 milyon.

Sinabi ni Lucas na ang halaga ay tila hindi katimbang ng sweldo ng alkalde sa gobyerno at iginiit na ang mga idineklarang ari-arian ni Lacson ay mas mataas kaysa iniulat na mga ari-arian ni Pangalawang Pangulong Sara Duterte.

Nanawagan siya para sa isang imbestigasyon kung saan nagmula ang kayamanan ng alkalde.

Hiniling din ng grupo sa Ombudsman na agad suspindihin si Lacson at ang iba pang mga respondent habang iniimbestigahan ang mga reklamo.

Hiningi ng pangkat ng balita ang panig ni Lacson, ngunit hindi pa siya naglalabas ng pahayag hanggang sa oras ng paglalathala.

(ELOISA SILVERIO)