NAMATAY ang isang lalaki habang inoobserbahan sa pagamutan ang anak nitong babae makaraang ma-trap sa nasunog nilang bahay sa Baseco Compound, Port Area, Manila, Miyerkoles ng gabi.
Bineberipika pa ng mga awtoridad ang pagkakakilanlan ng mag-ama.

Base sa ulat ng Manila Fire Department ng Bureau of Fire Protection (BFP), bandang alas-6:44 ng gabi nang magsimula ang sunog sa ika-2 palapag ng bahay sa Block 15-A, Baseco Compound,

Port Area, Manila, na sakop ng Brgy. 649, Zone 68, sa District 5, na pagmamay-ari umano ng isang Mastora Guimat, at inuupahan ng mag-amang biktima.

Nabatid sa imbestigasyon ng Arson Division, dahil sa pagkataranta ng mag-ama ay pumasok ang mga ito sa banyo kung saan sila na-suffocate.

Ayon sa BFP, umabot sa 150 pamilya ang nadamay sa sunog na tumupok sa 100 kabahayan. (RENE CRISOSTOMO)