MONEY MAN Ni VICTORINO O. VASCO III

– ANO ba ang operasyon ng bangko?

Nanghihikayat ang mga bangko na mag-impok ng pera o salapi sa kanila. Bawat halaga ng salapi ay may ­katumbas na interest o kita.

– Bakit nagbibigay ng kita sa simpleng patago ng pera sa mga bangko?

Ang mga perang naka­deposito sa mga bangko ay ginagamit nila upang ipautang sa kanilang mga kliyente, may katumbas na interest o kita ang mga bangko.

– Paano kumikita ang mga bangko sa pagpapautang sa mga kliyente?

Ang mga deposito sa bangko ay may katumbas na interest gaya ng 3% kada taon, nagdadagdag lamang sila nang mga 2% interest para kumita. Kaya ang 3% interest sa deposito ay magiging 5% interest sa mga manghihiram. Sa halimbawang ito, magkakaroon sila ng 2% na kita sa bawat halaga ng perang pinahiram nila bawat taon.

– Paano nasisiguro ng mga bangko na maibabalik ang mga perang ipinahiram nila?

May mga ekspertong ­empleyado sa bawat bangko para tiyaking maigi na may kakayahang magbayad ang bawat kliyenteng gustong umutang. Naka-agapay rin ang Bangko Sentral ng Pilipinas para matiyak ang katatagan ng mga bangko sa Pilipinas at masubaybayan na ­sumusunod sila sa tamang regulasyon at patakaran.

– Paano nalalaman ng bangko kung may sapat pa silang pera o deposito para sa pautang at sa mga ­nagwi-withdraw?

Mayroong departamentong nagkokontrol sa galaw at presyo ng perang nakatago sa bangko. Responsibilidad nila tiyakin na mayroong sapat na perang nakalaan sa pautang at sa mga magwi-withdraw ng deposito. (Sila ang may hawak sa kaban ng bangko o ­Treasury Department sa wikang Ingles).